الجمعة، 24 ديسمبر 2021 - 06:48 م

"بيب بيب بيب بيب"..
خير يا "سطا" في أيه؟! 
استنى أنت بس يا "هندسة" علشان ده غلط فيا.
يا "سطا" مفيش غلط ولا حاجة الرجل مفتحش بوقه..

لم يقتنع السائق بمحاولات التهدئة وهتافات الركاب "كفااااية يا سطا وهدى السرعة".. حتي وصل إلى سيارة ميكروباص أخرى وأوقفها وبدأ في ضرب السائق "بقى بتشتمني أنا بالكلاكس"؟!.

"لغة الكلاكس" هي لغة متعارف عليها بين سائقى المكروباصات طبقا للسائق.. "اه يا هندسة بنشتم بعض بيها أحسن ما نشتم بعض بألفاظ خارجة وبيبقى معانا حريم وزي مانت فاهم عيب يسمعوا الكلام ده"..

إجابة مقنعة من السائق قبل أن يكمل رده عَلِى سؤالي.. طب يا "سطا" طالما الدنيا ماشية بالكلاكس ليه نزلت ضربت السواق".. يا هندسة ما أنت متعرفش أصله زودها حبتين!..

يعنى يا "سطا" أنتم لقيتم حل علشان الركاب متسمعش ألفاظ خارجة ودي مبادرة حلوة منكم.. لكن بتضربوا بعض في الأخر!

"يا هندسة أقولك ايه احنا كده لما بنلاقي حل لاي مشكلة تلاقي ناس تبوظه وتزودها.. طب أقولك التقيلة.. في سواقين ملاكي بقيت تقلدنا وخلاص وتفضل تدوس عَلِي الكلاكس وفي منهم ستات والمشكلة انهم مش فاهمين.. وتلاقي ست عمالة تدوس عَلِى الكلاكس وتزنق عليك.. قولي بقى أنا أرد عَلِى ست بالكلاكس إزاي".

الخلاصة.. "تحية لسائقي المكروباصات عَلِى لغة الكلاكس.. وياريت الستات متستخدمهاش "