الخميس، 30 ديسمبر 2021 - 05:48 م

آه  يا نفوخى.. هيضرب من عمايل الخواجة كيروش ..بعد ما أشرك كل من هب ودب ولبس شورت ولعب كورة شمال  لاعبهم فى البطولة العربية اللي  خرجنا منها فى المركز الرابع  وخسرنا البطولة وراحت الدولارات الكتيرة
شوفنا  ياسين بيلعب وكمان  مروان حمدى وأحمد ياسر . .وكل الشباب اللى حاطين أمل انه يشملهم الاختيار من المدرب السامى كيروش الهمام قبل البطولة الافريقية اللي  هتتلعب فى بلاد الادغال يا خال . بلاد صمويل إيتو وميلا الكاميروني الجميلة ..

اختيارات عمنا  كيروش غريبة وعجيبة تصوروا صمم على  استبعاد طارق حامد.. قولنا ماشي يمكن عايز يلعب كورة هجومية فى البطولة دية
اما استبعاد قفشة ..معناه ان الكوره فى دماغ كيروش ناشفة. يعنى  دماغة محجرة وده فى معظم المباريات بيرجعنا ورا
وكمان طير النفاسة والصاروخ وصاحب أجمل هدف يا خال فى  مرمى السودان..  كلام كتير  انكتب عنه أحمد يا رفعت رجعنا لزمن رفعت الفناجيلى اللي  كان بيشوط برجليه الاتنين وممكن يسجل فى المباراة  الواحده هدف أوهدفين.

لعل وعسى اخونا كيروش  وما يكونشي واخد البطولة الافريقية تجربة فنية ذى البطولة العربية ..حد يوصلوا كلامى الطريقة  ديه ضيعت مننا البطولة العربية  ..ويا خوفي لتضيع بعدها الافريقية..وكل ده خطوة محفوفة بالمخاطر يا شاطر فى  طريق المونديال اللي  موصلتلوش يا كيروش استاد القاهره تانى متدخلوش..
يارب انفخ فى صورة الولاد ويرفعوا علم البلاد فى كل المباريات ..وقتها كلام كتير يتقال يا خال .. ويجعله عامر .