الأحد، 06 مارس 2022 - 06:41 م

أكد مرتضى منصور رئيس نادي الزمالك، أن المنافسة على بطولة الدوري مازالت قائمة مطالباً لاعبي الفريق الأبيض بعدم الالتفات لما يتردد حول حسم الغريم التقليدي الأهلي للبطولة. 

وتابع: "عندكم بطولة مهمة اللي هي بطولة الدوري، وبطولة أهم وهي بطولة إفريقيا اللي مخدنهاش من 2002، الرجالة اللي كسبت الكونفدرالية وكسبت السوبر الإفريقي في قطر والسوبر المصري في الإمارات، أثبتت إنهم أحسن لاعيبة في مصر، عشان كدة مش لازم تتأثروا بحالة الإحباط اللي الإعلام بيصدرها، اللي منهم بعض الزملكاوية وغالبية المعلقين الأهلاوية".

وأكمل: "أي لاعب في الدنيا بيمر بمرحلة انتصارات وانكسارات، وده اللي حصل آخر 3 أشهر بعدم الفوز في أي مباراة لحد ماتش فيوتشر، الفوز في الماتش ده كان مهم جداً، لحد آخر لحظة عايزين تكسبوا، أهمية الماتش ده أن أسامة نبيه اللي بيتهاجم من حازم إمام وأشرف قاسم وفاروق جعفر ووليد عبداللطيف اللي محسوبين علينا زملكاوية كسب، أسامة مكنش مدير فني قبل كدة لكنه كسب الولد بتاع الأسيوطي اللي بقاله 500 سنة بيدرب". 

وأضاف: "أتعلمت دايماً أشوف نص الكوباية المليان، وكنت أتمنى الزملكاوية يعملوا كدة، فيوتشر ده الأهلي أتعادل معاه بالعافية، محمود علاء ومحمد عبدالغني من أحسن المدافعين في مصر، أوعى الإحباط يوصلكم، سيف الدين الجزيري هداف كأس العرب، وتراجع مستواه وارد، لكنه عليه استعادة مستواه وكذلك حمزة المثلوثي، مفيش لاعب هينضم لمنتخب بلده وهو وحش". 

وأردف: "مشكلة أشرف بن شرقي أن دماغه مشغولة شوية، ودايماً بيحب يروح دبي، لكنه لاعب موهوب ومهاري، ولكنه فاقد تركيزه".

فيديو.. سداسي الزمالك يوافق على التجديد