الأربعاء، 16 مارس 2022 - 07:08 م

بقلم: د. رانيا يحيى

من أيام بسيطة أطلق الريس المشروع القومى لتنمية الأسرة المصرية، والحقيقة المشروع دا فى رأيى أهم مشروع بتقوم به الدولة، طبعاً جنب المشاريع التنموية والاستثمارية والإنشائية الضخمة، لكن كتير بنقول بناء البشر قبل بناء الحجر وعلشان كدا بشوفه الأهم لأنه بيشتغل على الإنسان وتنميته من كل الجوانب علشان يعرف يحافظ على بنية بلده فلازم يكون فى أساس فى الشخصية نقدر نبنى عليه، ونحافظ على بلدنا وثرواتها.

وبنقول للست المصرية اطمنى وحطى فى بطنك بطيخة صيفى لأن الدولة بتساعدك وبتوفر لك كل سبل الأمان والراحة لك ولولادك وحتى لجوزك وأهلك، وإن المشروع دا هيصب فى مصلحتك بشكل مباشر. فيابخته اللى عنده راعى مسئول عن رعيته وريس بيفكر فى كل صغيرة وكبيرة علشان بلدنا تتقدم.

وإن كان المشروع دا بيشمل صحة وتعليم وثقافة ووعى وشمول مالى وغيره، إلا أن الريس أشار لقنبلة موقوتة بتلتهم التنمية وتخلينا مانحسش بإنجازات كتير بتحصل على الأرض، أو بمعنى أصح مانحسش بالعائد والنفع لينا، المشكلة دى هى الأهم والأخطر فى مجتمعنا دلوقتى وهى قضية الزيادة السكانية، ودى كارثة حقيقية بتواجهنا..

أما لغاية النهاردة نلاقى أسر متوسط الإنجاب فيها 5 أطفال نبقى فى كارثة بجد، وأنهى دولة تقدر تسد على زيادة بالشكل المرعب دا، بجد لازم نعمل واقفة ونغير ثقافة الستات ووعيهم وموروثاتنا اللى عايشة وبتكبر عند البعض بإن الست تربط راجلها بالعيال، وكل ما تجيب عيال أكتر ما يقدرش يسيبها معرفش ازاى!!. يا حلوة يسيبك ونص ولاهيفرق معاه عيال ولاغيره وتحتاسى بيهم، اللى عنده نية يسيبك كدا كدا هيسيبك مش فكرة عيال خالص، واللى هتقدرى بعقلك تحتويه وتحنى عليه وأنت محافظة على نفسك وصحتك ما يسبكيش حتى لو من غير عيال.. الفكرة فى أخلاقه ومبادئه مش بالخلفة وعدمها.. وعجبى على موروثاتنا اللى بتضيعنا.