الجمعة، 18 مارس 2022 - 05:37 م

- ممكن أعرف سبب ارتفاع الأسعار كل يوم ويمكن كل ساعة ؟
- مش احنا اللى بنرفع الأسعار.. الحرب هى السبب .

- السبب ازاى ممكن تفهمنى ؟
- علشان الحاجات المستوردة يافندم من روسيا وأوكرانيا .

- وإنتم لحقتوا تستوردوا بالغالى دى الحرب مابقالهاش أسبوعين !!
- احنا عملنا حسابنا من أول يوم فى الحرب .. لأننا هنستورد القمح بعد كام شهر بالسعر الجديد.

- طيب لأننا كنا بنستورد منهم القمح فالعيش ممكن يغلى .. إنما الفراخ تغلى ليه ؟ والبيض يغلى ليه ؟ والجبنة البيضا ؟ والطماطم والخيار .. لا احنا بنستوردهم، ولا الحرب طالت مزارعهم !
- مادام المستورد بيغلى والناس بتشترى.. يبقى ليه مانغليش المحلى وبرضه الناس هاتشتري!

- وقعت بلسانك ..يعنى مش الحرب هى السبب، وانتم اللى بتنتهزوا الفرصة لزيادة مكاسبكم وأرباحكم.
- يافندم إحنا فى سوق مفتوح والشاطر اللى يعرف يركب الموجة.

- يعنى مش خايف من الأجهزة الرقابية والحكومة ؟
- صباح الخير يا أستاذة احنا فى سوق مفتوح، والتسعيرة الجبرية اتلغت خلاص، وكله عرض وطلب.

- طيب وضميرك ؟ إزاى يسمح لك تستغل الناس وتبالغ فى الأسعار .
- ضميرى مرتاح وبيسمح لى.. إذا كان الناس بتسمح لنفسها تشترى بالغلا  .. أنا هاكون أحن عليهم من نفسهم !!

- معاك حق.. إنت جبت التايهة العيب فى الناس، هما اللى بيشتروا!!  العيب فى الناس.. هما اللى بياكلوا ويشربوا علشان بيجوعوا!! وهما اللى بيشتروا هدوم تسترهم !! وهما كمان اللى بيركبوا مواصلات !!
- ياريت الناس تبطل الحاجات دى كلها، وتبطل تعيش زى البشر علشان نخلص من جشع التجار !!!
اللى بيقولوا انه هو السبب الأول والأخير للغلا والكوا.