السبت، 23 أبريل 2022 - 08:57 م

سارة الذهبى

نفسى الكلام ده الرجالة والستات تقراه عشان لو فى راجل تجاوز شوية فى علاقته بواحدة غريبة يفوق لنفسه ويقطع معاها ويتقى الله فى بيته ومراته

انا عارفة ان كلامى ده ممكن يزّعل ناس كتير من نوعية ال «open minded» بس هو ده الصح و لازم يتقال.
فى عصرنا ده اختلطت العلاقات ببعض..
و تضاربت المُسميات..
يعنى الخيانة بقى يتقال عليها صداقة…
و الزنا بقى بيطلعله مبررات بالكوم..
و هدم البيوت بقى بالساهل…
فى نوع من «الاستهبال» بقى منتشر فى زمننا ده محدش فينا كان متعود انه يشوفه قبل كده..
خصوصًا فى علاقات الموظفين و الموظفات فى الشغل…و كلامى ده خال من التعميم بس احنا بنرصد ظاهرة بتهدم بيوت كتير..
الراجل من دول تلاقيه متجوز و عنده عيال و واخد راحته مع زميلته فى الشغل اللى متجوزة برضه و عندها عيال…
معظم حالات الطلاق و خراب البيوت بقت بتشترك فى سيناريوهات محددة و الشائع منها علاقات الشغل اللى فيها تجاوز و تعدّ لحدود الزمالة فى الشغل…
وصلتنى عشرات الرسائل تحمل نفس الشكوى المتكررة.. رسائل تقدر تحس فيها بدموع الزوجات الموجوعة اللى تفاجأن بأن أزواجهن على علاقة بزميلاتهن فى الشغل وقد تكون الزميلة دى صديقة ليها و تعرفها عن قُرب و دخلت بيتها !

والأغرب ان وصلتنى رسائل كمان من الطرف التاني… الستات اللى بيشتكولى ان فى رجالة متجوزة معاهم فى الشغل وبيتمادوا فى علاقتهم بيهم و بيتجاوزوا الحدود وفى الحالة دى يا إما الست بتراعى ربنا و بتوقّفه عند حده بكل الطرق الممكنة حتى لو وصل بيها انها تسيب شغلها علشان تبعد عن زميلها اللى بيطاردها و بتخاف فى يوم تضعف ويأثر عليها.
يا إما الست بتضعف و بتتجاوب معاه و تبدأ بينهم سلسلة من المكالمات و اللقاءات و وعود بالجواز و الله أعلم العلاقة دى بتنتهى على ايه !!
و معروف ان الراجل فى الحالة دى بيدخل للست بأنهى مدخل؛ هتفتكروا ان ده كليشيه بيتقال فى الأفلام والمسلسلات بس للأسف ده بيحصل فى الواقع و بيتصدّق…
بيدخل من سكة انه مش مرتاح مع مراته و عايش معاها عشان خاطر الولاد و بس و إنه نفسه ينهى العلاقة دى بس عشان هو شهم و ابن أصول فا هيحافظ على بيته بس هو مش قادر يستحمل الوضع ده ، خصوصًا بعد ما قابل فُلانة زميلته فى الشغل اللى ارتاحلها و لقى فيها كل المزايا اللى كان بيحلم يلاقيها فى مراته!!
و ساعات فى رجالة بتُسبك الحكاية ان مراته مريضة و هو بيخدمها و زهق من روتين الحياة ده و انه عشان ما يظلمهاش و يطلقها فا بيدّور على واحدة يحبها بجد تعينه على مرار الأيام اللى بيشوفها مع مراته….

ده غير بقى التحابيش المعروفة انهم مش متفاهمين و دماغهم عكس بعض و مفيش نقطة يلتقوا فيها و إنها مشغولة بولاده عنه ….
انتوا كده من كلامى فاكرين انى برمى اللوم على الراجل بس؟؟
طبعًا هو مُلام مش عايزة كلام
بس اللوم كمان على الست اللى سمحت لنفسها تسمعله و هى متجوزة !!
اللى إديتله مساحة الفضفضة انه يتكلم معاها بالأريحية دى و طبعًا كل المكالمات دى من وراء جوزها!
انا مش ببالغ لما أقولكم ان الرجالة و الستات دول بيسموا الرغى فى التليفون بالساعات سوا و الهزار بالإيد و التسبيل و كلام الحب اللى بيتقال بينهم من تحت لتحت ان دى « صداقة» و انه عادى يحصل…
و للأسف مواقع التواصل الاجتماعى فى زمننا ده سهلت أوى العلاقات المشبوهة و بقينا كتير نسمع ان ده زميلى فى الشغل و برتاحله فا بنخرج مع بعض لوحدنا و نتكلم سوا بالساعات كل يوم فى الشغل و لما بنرّوح بنتواصل سوا ؛ و بحكيله على كل تفاصيل حياتى و هو كمان بيفضفضلى و بعيط على كتفه لما بتضايق و بغير عليه و يغير عليا !!!
لو حكيتلكم قد ايه ستات ندمت بعد ما خربت بيتها و خسرت جوزها و اتطلقت عشان صدقت وعود زميلها فى الشغل المتجوز اللى وعدها انه هيطلق مراته عشان خاطر عيونها و عشان يتجوزها و ساعة الجد خَلع و قطع علاقته بيها !!

و كمية الستات اللى واجهت أزواجها بإن الحياة بقت بينهم مستحيلة و ان الحب مات بينهم بسبب الوعود اللى اتوعدت بيها و بعد ما جوزها اكتشف خيانتها و انها كانت على ذمته و تعرف زميلها فى الشغل و حبته و لولا ستر ربنا كانت هتحصل جريمة قتل دفاعًا عن الشرف و بعد ده كله حبيب القلب بيخلع و يختفى من حياتها عشان ميقدرش يخرب بيته دلوقتى و يطلق مراته !؛ لأ و ده ساعات كمان بيتهمها انها فهمت كلامه غلط و انهم مجرد زمايل!!

كلامى ده طبعًا يبعد كل البعد عن التعميم لأن فى رجالة و ستات قمة فى الإحترام و حاطين حدود فى تعاملاتهم مع كل زملائهم فى الشغل و بره الشغل..
بس بما إن الطلاق بقى ظاهرة متفشية و جنبها المئات من علامات الاستفهام فلما تطرق الخبراء لأسبابه وجدوا ان التجاوزات فى الشغل كانت سببا قويا جدًا لتفشى الطلاق…
ده غير بقى الرجالة اللى بتتسلى على البنات اللى لسه متجوزوش فى الشغل و بيضغطوا على الوتر الحساس انهم اتأخروا فى الجواز و يقنعوهم انهم يكونوا زوجة تانية فى السر.
وصلتنى خمس رسائل من بنات بيحكولى نفس القصة بتفاصيل شبه بعض.

ان فى زميل فى الشغل عامل عليها «كماشة» و بيلاحقها علطول عشان تديله فرصة يقرّب منها و يتجوزوا فى السر ، و فاكر انها هتقبل علطول عشان سنها و كإن البنت دى صيد سهل و المفروض انها تتنازل عن حقها فى جواز شرعى مُعلن عشان سنها بالنسباله عدّى سن الجواز !!
و معظم البنات دى ربنا يكرمهم استحرموا يخربوا بيت الست اللى ما يعرفوهاش و ضحوا بشغلهم و سابوه و غيروا أرقام تليفوناتهم عشان يقطعوا أى سبيل بينهم و بين العلاقة دى !!
لحد دلوقتى هتقولولى يعنى هما الستات ملايكة!!
الغلط كله واقع على الرجالة و بس؟؟
هقولك ان فى ستات للأسف أضل سبيل و العياذ بالله!!
يبقوا عارفين ان الراجل متجوز و حياته مستقرة و مبسوط و يفضلوا يتدحلبوا لحياته سِنه بسِنه و يهتموا بيه بالعافية فى الأول و يفرضوا نفسهم عليه بدون خِشا و لا حيا … و كلنا عارفين إن الزّن على الودان أمرّ من السحر خصوصًا مع نوعية الستات اللى لما بتحط حاجة فى دماغها ما بتسكتش الا لما بتوصلها !!

واحدة حكتلى فى مرة ان جوزها محترم و لاحظت انه متغير معاها بقاله فترة و بِعد عنها و لاحظت تغيير فى تصرفاته و بعد كذا شهر جه واجهها و اعترفلها ان فى بنت معاه فى الشغل قعدت تزّن عليه و تحاوطه من كل اتجاه و تهتم بيه بشكل مش طبيعي… و فى الأول صدّها بس مع إصرارها بدأ يستجيب لمكالماتها و طلب منها تخرج معاه بس عشان هو شخص كويس و بيخاف ربنا جه فى لحظة وقف مع نفسه و قرر انه ما يتماداش فى العلاقة دى لإنها حرام و لإنه عمره ما هيتجوزها عشان كان شارى بيته و مراته…
فا لو بنقول ان فى رجالة بتزّن على الستات فا فى ستات و بنات ما بتسيبش الرجالة فى حالها بس نرجع و نقول مفيش حد عبيط .. و مفيش حد بيتضحك عليه…
و اللى عايز يوقف حد عند حدّه هيعرف…
و اللى عايز يستهبل هيكمل فى علاقة ممكن تكون نهايتها يا جواز عرفى يا جواز فى العلن بس فيه خراب بيوت و تشتيت لأسرة يا علاقة محرمة و زنا و العياذ بالله !!
و اللى عايز يخون هيلاقى مليون مبرر و مليون غلطة يلّبسها لشريك حياته اللى وثق فيه و كافى خيره شره عشان يثبت لنفسه انه ضحية مش جانى و انه مش مرتاح فى حياته بسبب تقصير من شريك حياته فا قرر يدخل فى علاقة تانى من غُلبه !
وجعت قلبكم بيوميات انهارده؟؟
انا آسفة…
بس كان نفسى الكلام ده الرجالة و الستات تقراه عشان لو فى راجل تجاوز شوية فى علاقته بواحدة غريبة يفوق لنفسه و يقطع معاها و يتقى الله فى بيته و مراته..
و لو فى ست متجوزة أو مش متجوزة تتقى الله و تحط حدود مع أى راجل غريب عشان ما يستغلهاش أو يتلاعب بمشاعرها و يجُرها لعلاقة غلط…
أنا عارفة ان ممكن يكون الراجل أو الست مش مرتاحين فى جوازهم بس مينفعش نصلّح العلاقة بعلاقة غلط؛ بإننا ندّخل طرف تانى فى حياتنا نلعب بعواطفه و نخليه يغرز فى علاقة محكوم عليها بالفشل من البداية!

لو عندك مشكلة مع مراتك اقعد معاها و اتكلم و حاولوا تحلّوها سوا و لو موصلتوش لحل يرضيكم ساعتها انفصلوا باحترام و ابدأوا حياتكم مع شخص جديد مناسب مش شخص تطلبوا منه يخرب بيته عشان يكون معاكم!

لو مش مرتاحة مع جوزك صارحيه لكن اوعى تخونيه و لو بكلمة أو ضحكة مع راجل غريب و تبررى لنفسك انك مش مرتاحة فى جوازك!!
الحلال بيّن و الحرام بيّن و مفيش حد عبيط بيتضحك عليه و لا يصح الا الصحيح فا متعيشوش دور الضحية و انتم اللى بتظلموا نفسكم و غيركم!
فوقوا قبل فوات الأوان…