الأحد، 05 يونيو 2022 - 01:11 م

قال الرئيس عبد الفتاح السيسي، إن قدراتنا الاقتصادية لا تتيح تقديم الخدمة الطبية بسهولة، معقبا: "اللي قدراته قليلة معندوش غير الأفكار وربنا يوفقه بفكرة لمسألة.. لو عندي قدرة على تقديم خدمة طبية بما تعنيه هذه الكلمة مش هايبقي فيه مشكلة، لكن المشكلة تأتي من قلة الموارد وقلة الأموال المخصصة، وعندنا في مصر موقفناش قدامه وما أحبطناش".

وأضاف الرئيس السيسي خلال افتتاح المؤتمر الطبي الأفريقي الأول،: "مفيش أبدا عقبة وتحدٍ يقف أمام إرادة لا تلين من أجل تجاوز هذا التحدي، فيه شركات عملاقة منجحتش بالأماني، ولكن نجحت بالارادة والإصرار والجهد.. حلينا مسائل كتير بالمبادرات مثل 100 مليون صحة وفيروس سي، ده كله استهداف لتجاوزات بحاجة بعينها.

وتابع الرئيس: "قوائم الانتظار اللي بنتكلم عليها، بتكلم على علاج طبي ضخم وعميلات حراحية كبرى، كان العدد اللي تم طرحه مكنش كتير بعد 3 أو 4 سنين وصل العدد 1.3 مليون عملية كبيرة تتكلف ما بين 100 إلى 400 ألف بما فيها نقل أعضاء، كانت القوائم 3 أسابيع قلت لدكتور خالد طيب نقلله مش هنخلي أبدا مريض يتألم في بيته، أى حد بيشتكي من عملية كبيرة نقدمله العلاج ونعمله العملية، متقدرش تعمل تأمين طبي شامل كامل في دولة زي مصر في فترة زمنية قليلة، ومستهدف الانتهاء من التأمين خلال عشر سنوات ولكن كانوا بيتكلموا في 15 سنة قلتلهم منقدرش نقدم خدمة بعد 20 سنة".

وواصل الرئيس: "اشتغلنا وأطلقنا البرنامج وأطلقناه في 5 محافظات وخلال مدة 10 سنوات نكون عملنا تأمين صحي شامل لكل المصريين، قابلنا تحديات كتير لكن ما أحبطناش، بنزيد 2.5 مليون كل سنة وحالات الوفاة نصف مليون يعني بنزيد 2 مليون كل سنة، يعنى 4 آلاف سرير يكلفوا 2.5 مليار دولار كل سنة للصحة، ده مخوفناش وقلنا إن مواردنا محدودة لا مقولناش هنفضل نشتغل أيوه ونتحدى التحدي أيوه لغاية لما نتغلب عليه إن شاء الله".

ويشهد الرئيس عبد الفتاح السيسي انطلاق فعاليات المؤتمر والمعرض الطبي الأفريقي الأول ، بمركز المنارة ، بأرض المعارض بالقاهرة ، الأحد 5 يونيو 2022.

وينعقد المعرض خلال الفترة من 5 إلى 7 يونيو 2022، بمركز مصر للمعارض الدولية (مركز المنارة للمؤتمرات الدولية)، وبمشاركة عدد كبير من الخبراء فى المجال الطبي ضمن فعاليات المؤتمر والمعرض.