السبت، 11 يونيو 2022 - 07:45 م

محمد صلاح

الأحد قبل الماضى كتبت رسالة لكل زوج، أحثه على تقديم رسالة شكر لزوجته، كى يساعدها على تجديد نشاطها، وبالتالى سيعود ذلك عليه هو....
منذ ذلك الوقت وصلنى العديد من الرسائل، معظمها يحمل كلمات شكر جميلة ورقيقة، بعضها يحمل الثناء مثل: ألف شكر، قول كمان، يا ريتهم يعرفوا، كنت فين يا عم... كما وصلنى رسائل من ازواج، لفت نظرى اربع رسائل

الاولى كانت من زوج بمجرد ان قرأ رسالتى، اتصل بزوجته ليطمئن عليها وفى نهاية المكالمة التليفونية قال لها أحبك، وبعد أن أنهى المكالمة بدقيقتين، اتصلت زوجته وسألته، انت كويس؟ انت تعبان؟ وكانت الإجابة: أنا بطمئن عليكى علشان عارف اننا تعبينك، وكمان حبيت اقول لك بحبك، واثناء عودته للمنزل اشترى وردة، دخل على زوجته بالوردة..... فى نهاية الرسالة شكرنى، واقسم أن حياته تبدلت تماماً، ويعيش حالة من الفرح الدائم، والسعادة الفائقة.. الرسالة الثانية من زوج هاجمنى مباشرة واتهمنى «انت مش عايش معانا، احنا مطحونين طول النهار علشان نجيب الفلوس الى بياكلوا بها، وردة مين يا رايق، انت عارف بتمن الوردة اجيب كام سيجارة؟! انت عايش فى دنيا وردى وردى».

الثالثة  «حسبى الله ونعم الوكيل فيك!!! انا كنت عايش فى تعاسة، فى جهنم مع مراتى، بمجرد أن قرأت كلامك، عملت زى ما انت قلت بالتمام، ومن وقتها عايش فى جهنم بالنار بتاعتها، اول حاجة مراتى قالت لى ايه المصيبة اللى انت عاملها، وراك ايه، انت بتعرف واحدة تانية، ومن يومها مراتى بتراقبنى، بتمشى ورايا وتكبس عليا فى الشغل، شكلى بقى وحش قوى امام زملائى، كمان بقت تشمشم هدومى كل يوم، وبتبصلى بشكل غريب لدرجة انى خايف، والله خايف، ربنا يسامحك انت والهيام بتاعك».

أما الرسالة الرابعة فكانت مختصرة جداً... انت عايش باين عليك فى كوكب تانى، او شكلك مش متجوز، وشكلك عايش فى الزمالك ولا المهندسين، او فى كمبوند من اللى مش بنشوفهم غير فى اعلانات رمضان، بص انا هختصر.. روح قول الكلام بتاعك ده لعم ضم ضم الراجل الشعبى، المصرى الاصيل، وهو هيقول لك غلطك».
جارٍ ترتيب موعد مع عم ضم ضم وحاشيته، ربنا يستر.