الثلاثاء، 09 أغسطس 2022 - 04:11 م

كتب: هاجر عودة

"اتصدمت فيه، وقت ما كنت راحه عشان أمضي علي ورقة إستلام فيزا معاش تكافل وكرامة في الشؤون الإجتماعية، أول أما نادوا عليا عشان اخد الفيزا، لقيت جوزي بيجري عشان يمضي، قالوا لا هي اللي هتمضي، عمل خناقة معاهم وقال لا أنا اللي همضي، ومن ساعة أما عرف أن الفيزا المفروض تتكتب باسمي، وهو معتبرني أني ناشز" تحكي مرفت صاحبة الـ40 عام عن سبب طلب الطلاق من زوجها.

وتقول مرڤت "مصدقت أني امسك فلوس بأيدي من غير ماحد يذلني، وأقدر اصرف علي ولادي، ولا يأخد الفلوس ويقعد بيها مع أصحابه، احنا أسرة بسيطة عندي 5 أطفال اتنين منهم معاقين، قبل اما اخد المعاش كنت عايشة حياة ذليلة مكنتش بشوف فلوس منه خالص، لحد اما ربنا كرمني، وبقيت بصرف علي أولادي، لحد اما جيه وضربي عشان ياخد الفيزا، واما رفضت رمي الأكل اللي عملاه عمولة للناس في الأرض".

وتستكمل" كان عندي 5 أطفال بصحتهم، لكن من كتر اللي بيشربه وزعيقه لأولادي وضربه فيا، في اتنين منهم بقي عندهم تخلف ذهني، طبعا قررت اني اشتغل عشان اصرف عليهم وأحاول ارجعهم لطبيعتهم، وده اخد مني مصاريف كتير، واضطريت اخد فلوس من أبويا عشان اعلاجهم، واخد الفلوس من ورايا وصرفهم علي مشاريبه". 

واختتمت "5 أطفال انا اللي بربيهم لوحدي ولا كأني متجوزة، بالعكس هو عاله عليا وعلي أولادي، علي الأقل أنا بشتغل من البيت بعمل اكل وبيعه للناس، وهو طول اليوم علي القهوة، وحسيت أنه وجوده زي عدمه، وطلبت منه الطلاق ورفض، فقمت برفع دعوي خلع والاستقلال بعيد عنه".

اقرأ أيضا | مريم في دعوى خلع: عينه من اختي