الأربعاء، 10 أغسطس 2022 - 07:13 م

- إيه حكاية قشر البيض اللى مالى البيت ده يا أمينة، يكونش يا ولية حد مسلطك تعمليلى حجاب محبة!
- مش للدرجة دى يا سى السيد هو انت عاد فيك نفس ياخويا تلعب بديلك كده ولا كده؟!
- اومال معناه إيه قشر البيض اللى موجود وسط هدومى فى الدولاب ده غير اللى تحت السرير وكمان تحت المخدة؟!
- أحب على يدك ياخويا تهدى كده ومتفهمنيش غلط،،أنا باعمل كده لمصلحتك ولما تعرف الحقيقة حتشكرنى يا سى السيد ومش بعيد ترضى عنى وتودينى الساحل اشم هوا!

- ساحل إيه يا ولية انطقى لحسن أسحلك فى الشقة كلها وامسح بيكى البلاط اللى مبقتش عارف امشى عليه!
- الحكاية وما فيها ان الست ياسمين فؤاد الله يعمر بيتها هى اللى خلتنى احتفظ بقشر البيض!
- وتطلع مين الست ياسمين دى أوعى تكون جارة جديدة.
- ساكنة ايه بس ياخويا هو فيه حد عارف يعزل من بيته اليومين دول، الست ياسمين دى تبقى الوزيرة!
- هو احنا عندنا وزيرة اسمها ياسمين يا ولية؟
- أيوه يا سى السيد وزيرة البيئة!

- وكمان عندنا بيئة أصلاً، والله عال عال والست ياسمين اتصلت بسعادتك قالتلك احتفظى بقشر البيض ده كله؟!
- ما هو  اللى مايعرفش فى العلم يقول ان الست ياسمين مش عارفة شغلها، يعنى من كام يوم قالت فى التليفزيون ان الشوارع اللى اتقطع منها الشجر مفيهاش تلوث وان اللى لسه فيها الشجر فيها تلوث،،النهاردة بقى عرفت تقنع الأمريكان يعملوا مصنع أكياس بلاستيك !
- يا مثبت العقل والدين يارب، الظاهر رجعتى تتفرجى تانى على الدكتور عمرو حمزاوى بعد ما رجع من بلاد بره.

- انت متعرفش ياخويا ان الكياس دى اللى بتجيبلنا فيها الحاجة من السوق مش بتتحلل الا بعد ٤٠٠ سنة؟
- خير وبركة،،وهو سعادتك عايزاها تتحلل بسرعة ليه،،أهو أقله مكناش محتاجين كل شوية نشترى كياس؟!
- أهو ده بقى متأخذنيش يا سى السيد الجهل بعينه،،انت متعرفش ان قانون تنظيم إدارة المخلفات رقم ٢٠٢ لسنة ٢٠٢٠ وضع حزمة ضوابط لاستخدام الكياس البلاستيك؟!
- قانون وحزمة ضوابط كمان عشان الكيس البلاستيك؟!! لا لا لا انتى كده عديتى مرحلة عمرو حمزاوى ولزمن الحق اوديكى الخانكة، كلام ايه ده يا ولية؟!
- طب بلاش القانون والحزمة انت متعرفش يا سى السيد ان بلدنا دلوقتى عاملة استراتيجية اقتصاد الأخضر؟!
- أخضر يعنى دولارات تقصدي؟ اهو ده الكلام، يبقى اخيرا الحكومة حست بينا وحتوزع علينا شوية من الأخضر؟
- ياخويا هو الحكومة عاد حيلتها شوية من الأخضر ولا حتى شوية من الأحمر ،كل الحكاية ان الست ياسمين اتفقت مع مصنع امريكى ياخد قشر البيض يحوله اكياس بلاستيك وعلشان كده انا قولت احتفظ بالقشر لغاية لما الحكومة تعدى علينا تشتريه مننا،،حانلعب بالفلوس لعب يا سى السيد وبلاط الشقة المفروش قشر بيض ده بكره حيبقى مفروش دهب وتبقى تقول امينة قالت ويمكن تعملى فيلم زى بتاع الست مرفت امين حافية على جسر الدهب  وتسميه حافية على قشر البيض وانا أغنيلك على قشر البيض دلعني! بس ياريت تكون إيجابى وتساعدني!
- طبعا لازم اكون إيجابى قوليلى ايه المطلوب منى.

- أنت عارف يا سى السيد ان قشر البيض ده علشان يفضل بحالة كويسة لازم البيئة اللى حواليه تحسسه انه فى عشة فراخ وانت ياخويا حيكون لك دور عظيم فى ده !

- مش فاهم طب اعمل ايه أنا علشان قشر البيض يفضل طازة لغاية لما الحكومة تيجى تشتريه مننا، أرقد عليه مثلا!
- مش للدرجة دى يا راجل،،كل المطلوب منك انك تكاكى جنب قشر البيض علشان يحس انه لسه فى عشة الفراخ.
- طب عن إذنك يا أمينة لازم أنام بدرى علشان أصحى اكاكى فى الفجرية،تصبحى على خير يا قشر البيض!
- من النهاردة ماسمهاش تصبحى على خير !
- اومال عايزانى أقول ايه يا أمينة؟!
- ودى عايزة كلام برضك،هى كلمة واحدة مفيش غيرها عايزاك تقولها ليل نهار:كوكو كوكو كوكوكوووو!!