الأربعاء، 12 أكتوبر 2022 - 05:42 م

الدنيا بكل ما فيها تعتبر «حق انتفاع».. لأنه لا يوجد أى إنسان يمتلك فيها أى شيء.
حتى لو معك أوراق ملكية لكل شيء لديك، فيلا أو شقة، أرض، عربية، حساب فى البنك، و...
نفس الفيلا أو الشقة التى أنت فيها باسمك، أو كانت باسم والدك، وبعد كام سنة - ربنا يطول فى عمرك - سوف تصبح باسم أولادك.

بهذا الشكل حضرتك كنت عايش فيها «حق انتفاع» حتى تنهى رسالتك بسلام، وتتركها لصاحب النصيب،، مثل  ما تركها لك الذى قبلك.. والدنيا كلها «بتلف كده» على الكل.
الغريب أننا بنتخانق.. ونكره.. ويمكن نخسر بعض على أشياء ربنا مسلفها لنا نقضى فيها كام ساعة أو يوم أو كام سنة فقط.
لا توجد ملكية حقيقية فى الدنيا، كلهم مجرد ملكية وهمية.
غرفة الفندق مثلا تكون معك يومى الإيجار، وبعد ذلك ترجع لأصحابها، أو كرسى الطائرة أو القطار أو الأتوبيس أو التاكسى، يبقى ملكك كام ساعة حتى انتهاء الرحلة.. وييجى الذى بعدك ياخده.

لو فهمت ذلك سوف تعمل حاجات كتير مش «بس» حلوة... لا حلوة «أوى»..
سوف تكون سعيد بالذى لديك وتعمل أشياء جميلة تفرح بيها مع كل حبايبك.
اقتصد بحكمة، لكن لا تبخل على نفسك ولا على من معك.
لا تتخانق ولا تضيع وقتك على أشياء تتحل ببعض التفاهم.
اخسر فلوس ولا تخسر راحة بالك،،، ولا تضيع عمرك على أشياء هى فى الآخر ليست ملكك.. فرح من حولك، افتكر إن كتير من الذى اشتريته، يااما نسيت إنه عندك، أو تلف وعت وباظ من الركنة.

بهذا الشكل سوف تكثر من أعمال الخير، علشان قلبك  يعيش مرتاح..
اللى عندك استفد منه.. وفيد الناس على قدر ما تقدر..
افتكر دايما أن الدنيا حق انتفاع.