الخميس، 15 ديسمبر 2022 - 05:56 م

أخونا شريف منير ممثل معروف ومن قبل كان عازفًا موسيقيًا على آلة الدرامز ثم اتجه إلى التمثيل وتقديم البرامج وفتح الله عليه الرزق من أوسع أبوابه. فى المسلسلات والأفلام والله يزيده ولكنى توقفت أمام جملة قالها مؤخرًا ونُشرت على لسانه وهى قوله: «كلنا بنعانى أنا بعانى وأحمد السقا وكريم عبدالعزيز، أنا نفسى بعانى من غلاء الأسعار والناس بتقول لى أنت عايش فى مية البطيخ؛ لأن المواطن العادى لما يكون عنده عربية متواضعة ويقف فى حتة ويجى له المنادى هيدى له جنيه أو 2 جنيه لكن أنا بدى حاجة تانية، فالمسألة نسبة وتناسب». انتهى كلام الممثل شريف معتقدًا أنه يا عينى ح يصعب على الناس ولكن واضح إن شريف عايش فى الدرة وفاكر أنه لحد دلوقتى فيه ناس بتدفع جنيه للسايس!! الأخ شريف أكيد عليه أقساط فيلا أو جيب شيروكى أو. أو. والله أعلم.
لكن الأخ شريف لا يعرف أن فيه ناس عندها ولاد فى المدارس والجامعات ومرتبها 3000 جنيه أو أقل فى الشهر وإن رغيف العيش للى معندهوش بطاقة تموين بأكثر من جنيه وهناك رغيف عيش بـ 5 جنيه والله وهل تعلم كم تصل فاتورة الكهرباء. أو المياه أو الغاز.. هل تعلم أن هناك ناسا ليس لديها ثمن الأدوية أو عمل التحاليل أو الأشعة؟

أخ شريف ليه يا أخى تستفز الناس. خد أجرك الملايينى والذى تدقق فيه واسكت وأحمد ربك واصمت!