الأربعاء، 26 أبريل 2023 - 09:23 ص

كشفت الفنانة حنان مطاوع تفاصيل مشاركتها في مسلسل «سره الباتع» مع المخرج خالد يوسف، وكيف بدأ الأمر بـ«عزومة فول وطعمية».

وقالت حنان خلال لقائها ببرنامج «مساء دي إم سي» عبر فضائية «دي إم سي»، "إن المخرج خالد يوسف كلمني مشكورا، فطبعا انبسط جدا، فقالي مسلسل لرمضان، قولتله المكالمة دي على رأسي من فوق بس أنا بحضر لمسلسل 30 حلقة اسمه كفر العميان، ومش هعرف أدخل في حاجتين مع بعض، وقولتله سامحني".

وأضافت "أنه سألني انتي بكرا فين؟ قولتله في البيت، قالي بكرا الصبح انتي وجوزك تعزموني على حاجة، قولتله حضرتك تنور، أعزمك على إيه؟ قالي فول وطعمية، مضيفة: «نورني في البيت، وحكالي القصة وكانت رائعة، فقولتله هنعمل إيه في الوقت، قالي اعملي الاتنين وهيتم التنسيق، متقلقيش، فقولتله توكلنا على الله، والمسلسل التاني قعد يتأجل يتأجل لغاية ما متعملش خالص».

وأوضحت "أن أكتر حاجة شدتي لشخصية صفية إنها من جذورنا، وحسيت إنها رمز للأرض، وهي صفية فعلا ومتفانية في حب الوطن والحبيب، وحسيت إني بعمل حاجة لبلدي، ومكنتش أعرف حجم الدور إيه، كان نفسي أعمل حاجة وطنية تؤرخ النضال والكفاح المصري ضد أي معتدي».

وأكدت "أنها طلبت من خالد يوسف أضرب فرنساوي أو أجري بالخيل، وأنا عمري ما ركبت خيل، أنا أشوف الخيل أجري، فهو أخدته الحماسة وقعد يكتب، وبعد كدا قالولي عندك بروفة مع الخيل، قولتله أنا».

واختتمت: «واحنا بنمثل أنا ركبت على الخيل من هنا وعياط عياط عياط، ييجي المشهد أمسح دموعي وأقول الجملتين، ويخلص المشهد واقعد أعيط».