صفوت ناصف

الجمعة، 28 يونيو 2024 - 03:33 م

 هاكتب  كلمة

هاكتب فكرة

هاكتب كل سلامي لبكره

هانده كل حروف النور

وأرصصها فوق الفكرة

والضم فيها سطر طويل

متعلق فيه القناديل

سطر بطول السما والأرض

متوضي وبيصلي الفرض 

مش هاتوقف أبدا يوم

أني أدون واكتب ذكرى

عدت يوم شايله الأحداث

حر فى قلمي 

حر الفكر

والأفكار بجمال البكر

هافضل أكتب واملا الكون

 ها يخطي كلامي العراقيل

والأقاويل

والفكر المتغطي بسرابيل

راح يهدم سد الممنوع

ولا مرة أبدا ها يجوع

وها يفضل دايمًا ينبوع

يبقى طوفان ما يوقفه حد

أيوه بجد

جوه العتمه هاكتب برضه

رغم حصار الضلمة  هاعدي

وازرع وردي ف كل مكان

أصلي نتاج مدن الأحلام

اللي دروبها مسفلته شمع

ولا تعرفشي أبدا دمع

كل اشجارها عايشه السمع

مليانة تفاح وزهور

والعمدان بتسقّط نور

نور مش عادي

لونه يراضي

حتى الريح لو كانت قوة

 مش ممكن أبدا تطفيه

ولا تستجري يوم تداريه

هاكتب حلم بيبرق حلم

كل ثواني فيه من علم 

واقع ماسك سيف العدل

عمره ماخلف أبدًا ندل

ولا إرهابي وشه جبان

ولا بيتاجر بالأديان 

هاكتب بالحبر المصرواي

اللي بحبه دايما ناوي

لونه  مسكر  مابيبهتشىي

مابيسكتشي

حبر تشمه تقوم شبعان

وتعافر مع كل الصعب

وتعلقه مشنوق فوق كدبه

وتعيشه أيام الرعب

هاكتب مليار كلمه وكلمه

جوه الوقت وجوه الغنوه

جوه صدها مليار قوه

هاكتب لوحه

منقوشه برسم الأجداد

فيها القرب.... ما فيها بعاد

فيها موكب جاي بالنصر

كل طبوله .....زمن أسياد

كل الكون يطلب فى رضاهم

علشان يبقى تحت سماهم

موكب فيه فرسان بجياد

فارد  كل رايات أمجاد

موكب يركع له الأبطال  

ف هزيمة أركانه محال

هاكتب وصفة ما اتوصفتش

وصفة فيها الرؤية رسالة

ماشية بقوة مش متشالة

ولا عاجزة تدافع عن روحها

ولا يقدر كائن يجرحها

حتى إن كان من ولد محال

هانسج من كلماتي قماش

كل ثواني فيه ينعاش

مهما يلف الوقت يعيش

مش من غش ولا من شاش

بعد سنين وسنين موجود

كل ثانيه ف عمره يجود 

هاكتب حب ماجاش أساطير 

ولا حلمت بيه الأمامير

اللي جمالهم مالهوش زى

دايمًا نابض دايمًا حي

هاكتب حب بيعشق غيه

ولا كاتب قرب من ضيه

ولا شاعر عمره كتب زيه

أصل كلام الحب معايا

عطره وفكره وكل مافيه

جوه دفاتر روحي وقلبي

 هاكتب لعب وهاكتب قرب

حبه سلام مع حبة صبر

هاكتب كل تاريخ فى بلادي

مين كان قائد

 مين كان عادي

مين غطاها

 ومين عرّٕاها

مين غماها

 ومين ورَّاها

مين من دمه

 داب فى دماها

هاكتب أرض وفرض وصوت

مين بحياته منع الموت

عن أحلامها وعن أيامها

هاكتب جامع ويا كنيسه

هاوصف كل خطاوي حثيثه

وإن الكون بدأت خطواته

من أرضي الغالية المحروسة

هاكتب دِين مزروع جوانا

مخلوط دايمًا جوه دمانا

هاكتب مد

 وعند وسوق

 حركة قوية وكلام ذوق

مع تحويجه

غروب وشروق

هاكتب نبض الناس الغالية

واوصف فيهم ثانية بثانية

هاكتب مصر

أد الكون...... وكل الدنيا