صفوت ناصف

الإثنين، 01 يوليه 2024 - 06:13 م

أنا شايف نفسي ف قلب النَص

عمال بتقطع وماحدش

عايز يلحقني

تقريبًا أنا باغرق مني

ف باحاول اعوم ضد التيار

أنا وحدي باواجه مية إعصار

على خط النار

واقف وباهاجم وبادافع

مظلوم عن حلمه بيترافع

ومافيش ولا شافع في الموضوع

أنا راكن هدفي ف مية ممنوع

أنا واخد عمري طريق مجهول

ومافهش رجوع

أنا باصرخ فيَّ بعلو الصوت

لكن تقريبًا مش مسموع

أنا فرحي بيتحول  لدموع

أيامي العتمة

لا يمكن يعني تنورها

ببقايا شموع

واحد موجوع

من كل اللي بيدخل روحي

أخلِص وأطيِّب في جراحهم

بيخونوا وبيزيدوا جروحي

أنا واخد جدًا ع الأحزان

متعود  اني اتباع واتخان

وخلاص بقى عادي ومتوقع

ان اللي يقرب من قلبي

لازم م الآخر يجرحني

ويسيبني وحيد

أنا حد عنيد

مش ممكن اسلم أو مرة

أطلع في الصورة إن انا مكسور ..

أنا عزة نفسي بتجبرهم

بالحكم عليَّ ان انا مغرور

واقف في طابور

مليان ملايين ناس ع الهامش

باتنفس لكن مش عايش

مش شايف حد بيشبه لي

حاسس بالغربة ما بين أهلي

كل اما الفرحة بتندهلي

مش باعرف ارد

فيه حائط صد

موجود علشان يمنع عني

كل اللي يقرب ويعينني

تسمعني باغني تموت م الخوف

الغنوة بتخطف روحك خطف

ف تلاقي مشاعرك متاخدة

مش عارف فين

وكأنه كمين

منصوب على أول طلعة روح

يسحب أوراقي اللي بتثبت

إننا أحياء

طبعا مشتاق

للحاجة اللي ترد الروح

الحاجة اللي تخلي حياتي

ليها طعم ولون

الحاجة اللي تعوض قلبي

عن كل آهات

الحاجة اللي بتشغل بالي

لكن مش عارف تطلع إيه