الثلاثاء، 06 أغسطس 2024 - 04:04 م

شاركت جهاد أحمد زوجة الفنان عصام صاصا صورة تجمعها بزوجها عبر استوري حسابها الشخصي بتطبيق الصور والفيديوهات "انستجرام".

وعلقت قائله: الحمد لله على نعمة الإيمان بقضاء ربنا، الحمد لله إننا متصالحين مع نفسنا قدام ربنا، إنك تبقى بريء قدام ربنا أحسن من أنك تبقى بريء قدام الناس، الحمد لله إن كل يوم بيعدي بتأكد أن إيماني بـ ربنا كبير رغم الوحش اللي فيا.

وتواصل «بوابة أخبار اليوم» نشر نص تحقيقات النيابة العامة في قضية تزوير عصام صاصا مطرب المهرجانات الشهير المتهم فيها برفقة شقيقه وآخرين، حيث كشفت أقوال مقدمة البرامج سارة خليفة تفاصيل واقعة التزوير.

وقالت سارة خليفة خلال تحقيقات النيابة في قضية تزوير توكيل عصام صاصا، أنا بشتغل مقدمة برامج وكمان في المكتب الإعلامي في الإمارات وعندي شركة متخصصة في تنظيم الحفلات وباخد المطربين وبعملهم حفلات في الكويت أو في الإمارات.

اقرأ ايضا| مروة عبد المنعم لـ بشرى: بطلي تقلديني في فساتيني .. والأخيرة: إحنا دافنينه سوا

وتابعت سارة خليفة، شركتي بدات في سنة 2021 وشغلي كـ مقدمة برامج من سنة 2012، وساعتها كنت بعمل برنامج اسمه مهمة صعبة، وعصام صاصا أنا بشتغل معاه حصري برا مصر وعملت معاه أكتر من حفلة في مدينة دبي زيه زي أي مطرب زي محمود الليثي والبحراوي وحمو بيكا وحماقي وغيرهم.

واستكملت سارة خليفة خلال تحقيقات قضية تزوير عصام صاصا، بالنسبة لمحمد أخو عصام صاصا ماليش علاقة بيه واللي أعرفه أنه شغال مع أخوه وبالنسبة لمعاذ مدير أعماله هو عارف المواعيد بتاعت الحفلات عشان كدة بتواصل معاه ومش معايا رقم أخو صاصا أما السيد الصعيدي صديق وكنت على تواصل معاه بكلمه بخصوص المطربيين.

وأضافت سارة خليفة، أنا اعرف عصام صاصا من سنتين ومعرفش أي حد تاني غير واحد اسمه إيهاب أبو الفتوح، ومن سنتين قابلته في معرض عربيات وعرفت أنه بيعمل توكيلات أو بيشتغل في الشهر العقاري بس مش فاكرة فين بالظبط، وكلمته قبل كدة بعد لما قابلته أو هو كلمني مش فاكرة وكان بيبعتلي معايدة على الواتس آب.

وأشارت سارة خليفة، وأنا اعرف المحامي محمد حمودة من الميديا وكان في واحدة صاحبتي عندها موضوع وروحت له من 3 سنين وكمان روحت له ساعة حادثة عصام صاصا، بناء على طلب عصام، وكل اللي أعرفه أني سمعت على السوشيال ميديا أن في مشكلة في توكيل عصام صاصا وأنه في تزوير في الموضوع.

وأكملت سارة خليفة، كل الوسط الفني راح لعصام صاصا لما كان محبوس، عشان هو غلبان جدا، وبعدها سافرنا أنا وهو وأخويا ومرات عصام، وقعدنا هناك 10 ايام وأنا رجعت وعصام فضل في دبي، وبعدها عصام قالي عايز حد بيعمل توكيلات اديته رقم إيهاب وبعدها الأخير كلمني قالي في مشكلة قولت له أنا مالي.

أنا مبنكرش أني كلمت إيهاب بس كلمته عشان عصام كان عايز يعمل توكيل، وماليش دعوة في مشكلة أو لا، ومكلمتوش وأنا برا مصر، ومعرفش اي حاجة عن واقعة التزوير اللي حصلت في شهر عقاري مجلس النواب، ومعرفش أي حاجة عن اللي قالته زوجة محمد أخو عصام لأني معرفهاش أصلا، وأكيد بتقول الكلام ده عشان خاطر جوزها.

وحددت محكمة جنايات الجيزة يوم 29 أغسطس أولى جلسات محاكمة مطرب المهرجانات عصام صاصا وشقيقه و2 آخرين أمام محكمة جنايات الجيزة في اتهامهم بتزوير محرر رسمي.