الأربعاء، 07 سبتمبر 2016 - 03:27 م

فوجئت وانا نازل الصبح بالحاج "بيومي" البواب ماسك فى رقبة "سيدة" مراته وفين يوجعك تدخلت وأقنعته بتركها وسألته بتضربها ليه؟ فأجاب: تخيل حضرتك متجوزها بقالى 20 سنة وبتاخد منى كل يوم 50 جنيه مصاريف الاكل بس وامبارح اكتشف الحقيقة المرة لما سمعت الست "فيفى عبده" بتقول ان الواحد ممكن يعيش بـ 5 جنيه.. طب طلاق تلاته منا سايبها غير لما تقولى بتودى فلوسى فين ؟ طبعا "سيدة" ما سكتتش وقالت طلاق على طلاقك منا قاعدة فيها وابقى هات الست "فيفي" تورينا هتكفيك بـ 5 جنيه ازاي؟ دول يا دوب تقطع بيهم تذكرة تتفرج على الحاجات فى السوبر ماركت وبعدين انت ليك عين تتكلم - طبعا بتوجه كلامها للمعلم بيومي- بعد سيادة النائب "عجينة" ما قال ان نص الرجالة عندهم ضعف جنسى وانت قاعد تقول هرفع عليه قضية طب انا اول واحدة هروح المحكمة واشهد انك من نص الرجاله الضعيف.. فصرخت فيهما: يا جماعة ما ينفعش كده شكلكوا هيكون ايه لو الشيخ فهد خطيب بنتكو "سعدية" سمع الكلام ده.
 ولسه ما خلصتش كلامى لقيتهم لطموا هما الاتنين فى نفس واحد وقال بيومى بحسرة: الشيخ "فهد" هج وساب سعدية وساب البلد كلها بعد ما عرف ان "الارانب" اللى كانت بتجيبها سيدة من البلد طلعت (فئران) والجزار اللى كان بيجيب منه اللحمة اتمسك وهو بيدبح حمير وطبعا عرف موضوع الفراخ بتاعت الضعف الجنسى.
 مشيت بعد ما فشلت انى اصلح بينهم بس اللى مزعلنى ان حلم السفر طار مع جوازة سعدية لانى عايش على أمل انها تتوسطلى عند طويل العمر يجيبلى عقد عمل.