الإثنين، 16 أغسطس 2021 - 11:56 م

شن بكري سليم المدير التنفيذي لنادي مصر للمقاصة هجوما حادا على ماجد سامي رئيس نادي وادي دجلة بعد تصريحات الأخير.

وقال بكري في تصريحات لبرنامج الماتش الذي يقدمه الإعلامي هاني حتحوت عبر شاشة صدى البلد "كنا في يوم من الأيام بنحترم هذا الرجل، الكلام اللي قاله ده يتحاسب عليه، وكان الأولى أنه يكون عنده جراءة ورجولة يعلن اسم النادي".

وتابع "ماجد بيقول كلام مالهوش أي لازمة، كوكو واوا إيه اللي بتقوله؟ هو في رئيس نادي يقول كوكو واوا؟، كنت مع معالي وزير الرياضة النهاردة ومعايا وليد هويدي واشتكيت له".

وواصل بكري"اتهامات غير مسئولة من رئيس نادي، ياريت يكون عنده شجاعة أدبية ويقول يقصد إيه، ونرفض هذا الكلام شكلًا وموضوعًا، إحنا مش بنغلط في حد ولينا أنياب وردنا عليه هيكون قوي".

وأضاف "المفلسين اللي اتكلم عليهم دول شرفاء ولهم مواقف محترمة، إحنا نادي وطني ولما لقينا نادي الإسماعيلي النادي الكبير والعريق في أزمة تنازلنا عن الجهاز الفني بالكامل، ده الطبيعي من نادي وطني زينا".
وأردف "المفروض ماجد سامي يشوف نفسه الأول، هو بيقول كلام مالهوش لازمة، واللي يتكلم علينا يترد عليه الصاع صاعين".

بكري سليم واصل تصريحاته قائلًا "ماجد سامي لازم  يتكلم عدل، لما يتكلم عن نادي ماسكه ناس شرفاء، لو أي نادي تاني غير المقاصة تعرض للظروف دي كان هبط، احنا بنصرف من جيبنا مال حلال محترم، مينفعش يطلع يغلط بألفاظ يقول كلام يعاقب عليه قانونًا، المفروض يقول أنا أقصد نادي مصر للمقاصة".

واستمر بكري سليم في تصريحاته "ماجد سامي لازم يروح يشوف ناديه، البعض بيقول إننا بنتفاوض معاه لإدارة المقاصة؟ إزاي نتفاوض مع واحد فاشل مع ناديه؟ هذا كلام غير منطقي".

واختتم بكري سليم تصريحاته "نمر بضائقة مادية وطلبنا من الوزير سلفة إحنا مش رايحين نشحت منه، هو بيساعدنا زي ما بيساعد باقي الأندية، في ظرف أسبوع أو 10 أيام هتروح الغمة".

رئيس وادي دجلة يهاجم أحد الأندية الشهيرة