الخميس، 16 سبتمبر 2021 - 06:00 م

محمد إسماعيل عمر

ذات ثلاثاء، اتصلت بى زوجتى وأنا فى الشغل:

اعمل حسابك مصاريف المدرسة وجبت

هم هايخشوا مدرسة السنة دي؟

مش مهم، المهم ندفع. السنة اللى فاتت ماعتبوهاش تقريبًا بس دفعنا

آه (أفضل دائما أن يكون حوار المدارس من طرف واحد فلا أجادل)

وهانجيب يونيفورم جديد صيفى وشتوى ولبس ألعاب

آه

ماحنا ماجبناش السنة اللى فاتت واهم مادخلوش. السنة دى كبروا مابيدخلش فى ركبهم.

اه

خد بالك كمان هاندفع الأتوبيس

ماحنا لينا اشتراك أتوبيس السنة اللى فاتت ماركبوش بيه

إيه يا محمد هو أبونيه؟ ماركبوش بيه يبقى راح عليهم. هاتدفع تانى السنة دى ومش أكيد يركبوه برضو

اه
سمعت إحدى الزميلات ابنها مع ولدى بالمدرسة المكالمة وسألتني:

انت هاتدفع الباص؟

آه

هو إيه اللى آه؟ فى سواقين بيعملوا دورات مدارس وبيبقوا أرخص وبتدفعلهم بالشهر يعنى حتى لو راحوا السنة كلها يقف أرخص وماتدفعهاش مقدم. انت ساكن فين بالظبط؟.

لمعت عيناى للعرض المغرى ووافقت على الفور. دخلت أميرة على جروب الماميز الذى ترفعت زوجتى العزيزة عن دخوله حرصًا على ضغطها الذى سينعكس سلبًا على سلامى النفسى.

عادت وهى تغمز: خلاص هايتصل بيك يأكد عليك حجزتلك مكانين لاقيتهملك بالعافية.

حمدت الله الذى هداها لإنقاذى، وفعلا لم تمر الدقيقة حتى رن هاتفى.

باشمهندس محمد؟

أيوه

باكلم حضرتك بخصوص فرصة لا تعوض

أنا عارف الأسعار كويس، هى فرصة آه بس أنا معروض على أماكن تانية برضو. حاولت أن أبدو مدقدق كيلا يستغفلنى أحد

مش هاتلاقى زى عندنا يافندم احنا أسعارنا بتبدأ من اتنين مليون تسعمية وتسهيلات فى السداد لحد أربع سنين.
أفكر قليلًا قبل أن أجيب:

بس كده اتوبيس المدرسة أرخص. يصمت الرجل محاولًا ابتلاع ما سمعه.

يافندم أنا باعرض على حضرتك توين هاوس مساحته ميت متر بكومباوند فاخر

ترحمت فى سرى على جدى الذى كان يسكن فيلا بنى مكانها الآن أربع عمارات. كان مهندسًا زميلًا وكان وياما كان...

بس مش ضيقة الميت متر دي؟ أصلى أحب الرحرحة

كده حضرتك تبقى عايز التاون هاوس يافندم

أمال التانى كان إيه؟

لا ده التوين هاوس يافندم

آه.. والكبير ده بكام؟

بيبدأ من تسعة مليون تسعمية وتسعين ألف حضرتك.

آه... طيب بس هاعمل مكالمة سريعة وارجعلك

لو حابب تستشير زوجة حضرتك ندخلها معانا كونفرنس

لا لا زوجة مين أنا سيد قرارى. بس هاكلم سواق الميكروباص اشوفه لو بيعمل دورات مدارس فى الكومباوند، أصله هايفرق عن أتوبيس المدرسة تمنميت جنيه وأهم يسندوا قسط الداون تاون.

قصد حضرتك التاون هاوس.
آه