الخميس، 23 ديسمبر 2021 - 09:21 م

عبد الصبور بدر 

مواليد 90 يا مؤمن بقى عندهم 32 سنة وده فى حد ذاته كارثة لمواليد 70 اللى داخلين فى حسبة بنت 60، وبيلطموا على العمر اللى اتسرسب من بين إيديهم، وبيشتكوا من وجع رجليهم.

أما عبارة «العمر مجرد رقم» فدى أظن قالها راجل مسكين زى حلاتنا اتقدم بيه السن فقرر ينكر الواقع، مع سبق الإصرار والترصد، ويعزى نفسه بكلمتين خايبين، أو ست كانت أول امبارح فى العشرين ولقت نفسها فجأة خمسة وخمسين ومش فاهمة أمتى ده حصل أو إزاى ولمصلحة مين؟

العبد لله مثلا كان من يومين بيحتفل بسنة 2000، وفاهم زيه زى أغلب جيله إن الرقم ده نهاية العالم والقيامة هتقوم، نام ساعتين صحى لقى نفسه فى 2022، وزيطة وزمبليطة، والدنيا كلها بتجرى وراه وهو بيجرى وينهج، وفى نفس الوقت مش قادر يقف عشان ما يخدش قلمين.. 

أقرا ايضا | احتفال طعمجى برأس السنة