الجمعة، 24 ديسمبر 2021 - 09:01 م

لو انت مش أهلاوى وعاوز تتفرج على ماتشات الأهلى ففى كام قاعدة مهمة لازم تاخد بالك منها.. أول قاعدة هى إنك لو عندك مرض مزمن وبتشجع فريق بيحلم انه ينافس الأهلى فنصيحة بلاش تتفرج لأن الفرجة خطر على صحتك.. تانى قاعدة هى انك لما فريقك يجيب جول فى الأهلى فبلاش تبالغ فى الفرحة ولو عاوز تفرح استنى لحد ما الحكم يصفر واللعيبة تخرج من الملعب علشان تطمن ان الاهلى خسر لاقدر الله.. وبلاش تستعد بدرى علشان تحفل على الأهلى وجمهوره على السوشيال ميديا وأوعى تغلط وتنزل بوست تحفيل والماتش شغال لأنك هتمسحه بعدها وهيبقى شكلك وحش أوى والتحفيل هيتردلك من اصحابك الأهلاوية.. القاعدة التالتة وهى انك لازم تعترف بقدراتك كمشجع وقدرات فرقتك أو الفرق اللى بتشجعها أدام الاهلى صحيح الطموح حلو بس مع الأهلى أقصى طموحك هو انك تكون وصيف للبطل.. أما القاعدة الرابعة والاخيرة هى انك لازم تعترف ان الأهلى هو ملك «البلس ٩٠».. سنين مرت ولاعيبة اتغيرت ومنافسين اختلفت اسماءهم ولسه الأهلى بيكسب بالضربة القاضية وبيسجل أهداف فى الدقائق القاتلة وبيحقق بيها بطولات صعب حد غيره يحققها.

وكفاية افكرك ان الأهلى فى آخر ١٧ سنة أحرز ٧٨ هدفا فى «البلس ٩٠» وما بعدها منها ٥٤ هدفا فى الدورى و٤ فى كأس مصر و٢ فى السوبر المصرى وزيهم فى السوبر الأفريقى و١٣ هدفا فى دورى أبطال أفريقيا و٣ فى الكونفدرالية. حكاية «البلس ٩٠» مع الأهلى مش حكاية حظ زى ما البعض بيعتقد دى حكاية وراها تخطيط وعزيمة وإصرار على المكسب.. حكاية جميلة وراها جمهور عظيم بالملايين بيثق ان فريقه قادر انه يحقق الفوز فى أى لحظة ودا سر «البلس ٩٠».