الأحد، 26 ديسمبر 2021 - 03:43 م

طبعا السنة بتجرى مننا والأيام بتعدى وحاندخل سنة جديدة بإذن الله كلها أمنيات وأحلام جميلة لكن حد فينا حاول يبص وراه ويشوف السنة اللى عدت دى أضافت له إيه.. عمل فيها إيه.. ياترى طلع خطوات أو حتى خطوة واللا لسه فى مكانه؟؟

كل واحد بس عمال يقول ويكتب بوستات على الفيس بوك أن السنة مرمطته وجت عليه وماصدق إنها عدت.. طيب ماتيجوا كده نبص نشوف الموضوع بشكل تاني..

بص حواليلك مش أهلك وأحبابك جنبك؟ عندك بيت سترك وجواه من وسائل الرفاهية سواء قليلة أو كتيره اللى بيخليك مرتاح؟ طيب شغلك.. مهما كانت صعوباته ومتطلباته بس مش أحسن من إنك تكون عاطل ومعندكش مصدر دخل؟

بلاش كل ده مش الحمد لله بتنام كويس وبتصحى مرتاح وقادر إنك تتحرك وتتولى مسئولية نفسك ومش محتاج حد يساعدك أو يسندك؟ طيب هى دى قليلة ياراجل، الحقيقة إننا عندنا نعم كتيره بنعيش تفاصيلها كل يوم وإتعودنا عليها لدرجة إننا مش حاسين بأهميتها.. لكن لو دققت حاتلاقى إن كل سنتوفة منها تستاهل نحمد ربنا ونشكره عليها كل لحظة.. إتأمل وتمعن فى النظر حواليك حاتلاقى رحمة ربنا محاوطانا وغرقانين فيها من غير مانحس..

من حقك تحلم وتتمنى الأفضل لكن كمان ماتنساش تحمد ربنا على اللى موجود وتتبسط بيه فإحساس الرضا بيزيد من جمال العطايا والنعم..
ياللا إحلم وإدعى بالخير وأحمد رب الخير..