الأربعاء، 11 مايو 2022 - 08:00 م

فى لقاء تليفزيونى أجرته فضائية لبنانية مع فارس السينما أحمد مظهر، سألته المذيعة اللبنانية عن أفضل الأفلام التى قدمها للسينما ويعتز بها فقال: «أعتز جداً بسبعة أفلام اختيرت ضمن قائمة أفضل 100 فيلم وهى «رد قلبى - الأيدى الناعمة - واإسلاماه - الناصر صلاح الدين - جميلة أبو حريد - القاهرة 30 - دعاء الكروان الذى رُشح لتمثيل مصر فى الأوسكار»، وتحدث كثيراً عن الفيلم الأخير وسيدة الشاشة العربية فاتن حمامة التى شاركها البطولة ولاحظت المذيعة أنه كان يسبق اسم فاتن حمامة بكلمة «الست فاتن» وعندما تحدث عن فيلم «لوعة الحب» تكلم عن «الست شادية»، وعندما ذكر فيلم «أيام الحب» تحدث عن «الست نادية لطفى»، وهنا استوقفته المذيعة قائلة:

لاحظت ان حضرتك بتسبق اسم كل زميلة عملت معها بكلمة «الست» مش غريبة دى ؟ !

أجابها قائلاً: لأنهم ستات بجد، وده أقل وصف يتنادوا بيه يا بنتى، وعلى فكرة أنا وكل أبناء جيلى من الممثلين الرجالة اتفقنا إن أسامينا تتكتب بعد أسامى النجمات اللى اشتغلنا معهن، لم نطلب أن تكتب أسماؤنا قبلهن، لأن ربنا لما خلق الست خلقها تاج، عمرك شفتى بلد اسمها مُذكر؟

قالت له المذيعة : لماذا تغيرت الدنيا فى كل شىء ولم تعد كما كانت على أيامكم ؟

قال: «ما اعرفش.. أنا صحيت فى يوم لقيت الهواء مش كويس، ولقيت الناس ما بتضحكش فى وش بعض، بطلوا يكتبوا لبعض جوابات، الجوابات دى ليها مفعول السحر لما بنحضر الكلام ونكتبه من أرواحنا، حتى العتاب فى الجواب بيبقى حب، ومش عارف إيه اللى شقلب المجتمع، السباك بقى صاحب العمارة اللى على أول الشارع، والعمارات ذوقها وحش، كتل خرسانية مفيهاش ذوق، والإيجار اختفى ومعرفش مين اللى كان وراء كارثة التمليك، والشقق غالية ومحدش من ‏الشباب قادر على تمنها، وحصل تجريف للأرض الزراعية، والشباب سافر للخليج، ومن الصعب تجدى فى مصر صنايعى شاطر».

عندى شعور ان حضرتك زعلان من مصر !

قال بدهشة: «لا يا بنتى أنا زعلان على اللى حصل فى مصر من تجريف فى الأخلاق والثقافة والفكر والفن والاقتصاد والسياسة والأدب والذوق والنظافة، مصر يا بنتى «ست» جميلة جدا، لكنهم شوهوها وحطوا من قدرها بالغباء والتعصب والكراهية والفكر المتكلس، لكن إحساسى بيقول إن مصر تمرض ولا تموت وسوف تسترد جمالها فى يوم من الأيام».

من «حديث تليفزيونى» - 1995

إقرأ أيضاً|«أمى يا ملاكى»و«صباح الخير يا مولاتى» فى احتفال الإذاعة بعيد الأم