الأربعاء، 22 يونيو 2022 - 06:37 م

- فيه إيه  في الجرنان شاغلك كده يا محمود يا حبيبي؟

- النهاردة الفاذر داى يا ولية وأنا باشوف العالم بره بيحتفل ازاي!

- ويطلع إيه الفاشر داى ده يا محاميدو؟!

-  اسمه الفاذر داي، يعنى يوم الأب!

- طب وانت كأب سايب الدنيا تقلب تعدل وقاعد تقرا الجرايد وتتفرج على صور الأبصر إيه داى ده ليه يا حبيبي؟

- يا فتاح ياعليم يارزاق يا كريم فيه إيه يا ست أنتى ع الصبح؟!

- انت مش حاسس يا حبيبى باللى بيحصل فى الأسعار اللى عمالة كل يوم تنط لفوق؟!

- ياولية ماتضيعيش دماغ الفاذر داى اللى انا عاملها وتكلمينى على الحاجات المادية دي، وبعدين انا مش لسه من كام يوم جايبلك تموين يكفينا لآخر الشهر؟

- فاضله يومين تلاتة بالكتير ويخلص يا محمووود، وانا لسه سامعة فى التليفزيون سى عمرو الدين بيقول ان اليومين الجايين زيت التحمير حايغلى تانى والحب حاتحصل فيه أزمة وتسعيرته حاتزيد!

- حب ايه ياولية؟

- قصدى السكر يا محمود السكر ، معلش اصلى لسه سامعة أغنية الست صباح، وبعديها على طول لقيت المذيع سى احمد عيسى بيقول ان السكر كمان حايغلى واحتمال يكون فيه أزمة يا حبيبي!

- يعني انتي قاعدة طول اليوم قدام اللى مايتسماش التليفزيون ده ولسه مش عارفة تنطقى اسم عمرو أديب وأحمد موسى، وبعدين عمال أقولك الفاذر داى والعالم كله بيهنى الأب وانتى جايه تقوليلى زيت وسكر وكلام فارغ بدال ما تقوليلى هابى فاذر داي؟
- وهو انت أبويا  يا حبيبى عشان أقولك هابى فايزر داي، انت جوزى يا محمود ولما ان شاء الله يبقى يعملوا «الجوز» داى ابقى أقولك، ألا يبقى اسمه ايه الجوز داى ده بالإنجليزى يا محاميدو؟!

- أكيد حايبقى اسمه الهاسباند داى !

- خلاص تبقى تفكرنى لما ييجى الهاسبار داى ده، بس اعمل معروف سيب الجرنان وتعالى شوف حانعمل ايه فى نصيبة الأسعار دي!

- يا وليه حلى عن سمايا دلوقتي، مش بتقولى لسه التموين يكفينا يومين كمان؟

- يا خويا انا باتكلم على أسعار فواتير الميه والكهربا والغاز اللى لو  ما تصرفتش واخدت سلفة من أى حد ومادفعنهاش حايتقطع علينا ميه ونور!

- يا ستي أنتي حد مسلطك عليا، وبعدين انا استلفت من طوب الأرض ومليش وش اطلب من حد حاجة تاني!
- دور كده في عيلتك ولا صحابك ياسي محمود يمكن تلاقي طوبة ولا قالب لسه مااستلفتش منه ياحبيبي.

- عملت ايه انا فى حياتى ياربى علشان أعيش مع ست بالعقلية بعد ما خدعتنى وقالتلي إني فارس أحلامها .

- انت مش بس فارس أحلامي لا انت فارسني أنا كمان يامحموووود!

- استغفر الله العظيم، طب أقولك روحي سخنيلى السلطة
- معدش فيه سلطة يامحمود القوطة غليت يا حبيبي!

- طب ممكن أبوس أيدك تمشي دلوقتي وتعدى الليلة دي من غير نكد؟!

- انت الخسران يا محمود، هيتراكم عليك ياحبيبي!!