الأربعاء، 29 يونيو 2022 - 07:24 م

- أمينة..أنتى يا أمينة اصحى يا ولية،مالك بتخرفى كده فى الكلام وانتى نايمة تكونيش شايفة كابوس ولا حاجة؟
- اسكت يا سى السيد اللهم اجعله خير،حلم رهيب يا خويا ولو كنت كملت نايمة كمان دقيقة واحدة كان زمانى مت ورحت فى خبر كان، بس الحمدلله ربنا بعتك ليا فى الوقت المناسب!
- يا ريتنى كنت اتاخرت شوية!
- بتقول حاجة يا سى السيد؟

- أبدا ابدا يا أمينة أنا باقول لو تحبى اجيبلك كوباية ميه وتكملى حلمك قصدى تكملى نومك يعنى!
- لا لا خلاص أنا لزمن أقوم اشوف المصالح اللى ورايا.
- استنى بس قوليلى شوفتى ايه فى الحلم عمل فيكى كده؟
- حلمت متأخذنيش يعنى يا سى السيد إنى نايمة جنب شوال بطاطا؟
- ما تحسنى ملافظك يا أمينة،،قصدك ايه ياولية ياخرفانة انتى؟
- احب على يدك يا سى السيد ماتفهمنيش غلط،أنا من ساعة ما صحيت وقلبى مقبوض من الحلم ده!
- مش فاهم ازاى يعنى نايمة جنب شوال بطاطا وإيه اللى يخليكى تصحى مقبوضة من حلم زى ده؟
- أصلى من كام يوم شفت واحد من بتوع تفسير الأحلام فى التلافزون بيقول يعنى ان اللى يشوف بطاطا فى الحلم دى حاجة مش كويسة وإنها دليل قال يعنى على قفص الماكنات والفوايد!
- ههههههه الله يحظك يا امينة اكيد قصدك نقص الامكانيات والموارد، بس ده طبيعى ما تقلقيش منه.
- ما قلقش ازاى بس يا سى السيد ده الراجل فى التلافزيون قال ان الست اللى تحلم بان معاها شوال بطاطا بحاله يبقى معناه ان عندها مشاكل فى الفلوس وعيشتها فقر وبؤس!

- طب وانتى شايفة انك عايشة فى فقر وبؤس يا امينة؟!
- لا طبعا يقطعنى يا خويا ماقصدش طبعا.ألا هو انت عمرك ما حلمت بانك بياع بطاطا يا سى السيد؟
- لا عمرى بس بتسألى ليه؟
- أصلى خابور تفسير الأحلام بيقول ان الراجل لو شاف فى الحلم انه بيشترى بطاطا كتير يبقى عنده قال أبصر إيه هموم ومشاكل كتير لكن لو بيبيع بطاطا يبقى كل همومه خلصت !
- هههههه اسمه خبير مش خابور يا ولية،بس على فكرة انا مرة حلمت زمان أنى بازرع بطاطا!
- اهى سى الخابور قصدى الخبير قال اللى يزرعها وهو عازب يبقى حايتجوز واللى يزرعها وهو متجوز يبقى حايشوف خير كتير
- غريبة حلمك ده يا أمينة انا لسه كنت بافكر ازرع بطاطا فى جنينة البيت!
- اوعى يا خويا تكون ناوى تتجوز عليا زبيدة ولا جليلة بتوعك!
- جواز ايه بس يا شيخة هو االلى يعملها مرة يفكر يكررها الحكاية انى سمعت ان الحكومة ناوية تخلط البطاطا فى الدقيق عشان توفر شوية فى القمح!
- يعنى بدال ما اروح الطابونة اقولهم عايزة بخمسة جنيه عيش اقولهم عايزة بخمسة جنيه بطاطا!
- أيوه وبدال ما قولك بالليل قومى احشيلنا رغيفين نتعشى اقولك قومى احشيلنا كوزين بطاطا!
- وأنا اغنيلك اغنية الصبوحة يا عينى ع البساطة،،وتغدينى جبنة وزيتون وتعشينى بطاطا؟
- ونسيب بقى اكل عيشنا قصدى يعنى بطاطتنا ونقضيها بقى اغانى وعجبانى!
- صدق اللى قال يا خويا ،متخافش من الحكومة خاف من خلفتها!!