السبت، 10 ديسمبر 2022 - 05:37 م

مساء الخميس الماضى، تلقيت رسالة صوتية من عم ضم ضم عبر الواتس آب، حيث كان يغنى بصوته:

« يا مسافر المنصورة استنى خدنى معاك

عشان جميل الصورة طول غيابه هناك

جمالها فى الوجود آية وفيها البحر زاينها 

وفيها الحسن وكفاية حبيب القلب ساكنها

عشقت الحسن والخفة، فى أرض الطهر والعفة

آه من البعاد آه من الهوى، استنى هنسافر سوا 

يا مسافر المنصورة «

على الفور اتصلت به وسألته : خير يا عم ضم ضم إنت كويس ؟!

عم ضم ضم : طبعاً كويس، إنت مشوفتش ريسنا حبيبنا السيسى فى افتتاح المرحلة الأولى لمدينة المنصورة الجديدة، ايه العظمة دى يا واد يا حمادة، مدينة ذكية، فيها جميع المرافق والخدمات، مناطق حكومية، أسواق، دور عبادة، أماكن ثقافية وترفيهية، وأماكن للمطاعم، وحدائق، وساحل بسم الله ما شاء الله  15 كيلو متر على البحر المتوسط، وكمان المدينة بتخدم سكان الدلتا، وفيها أربع جامعات، المنصورة الجديدة، المنصورة الدولية، المنصورة الأهلية، المنصورة التكنولوجية، غير محطة تحلية مياه جوفية، ومحطة تحلية مياه البحر كأول محطة تحلية مياه البحر فى الدلتا، وكمان محطتين لمعالجة مياه الرى، مدينة خضراء، صديقة لحركة المشاة والدراجات، والشواطئ المفتوحة لكل المصريين.

المنصورة دى مدينتى أنا مولود فى المنصورة، وأخذ يغنى 

« دا اسم فى غنوة تتغنى، وكل الناس بتنشدها

وعالبحر الصغير جنة تهنى قلوب وتسعدها 

وفيك الحسن والخفة، وفيك الطهر والعفة

آه من البعاد آه من الهوى  

يا مسافر المنصورة استنى هنسافر سوا»