الأحد، 26 نوفمبر 2023 - 08:55 م

كانت ترى أن مفارش وأشغال الكروشيه الموجودة فى كل بيت تحمل بصمة صاحبة المنزل ففكرت كيف تصنع بصمة جديدة خاصة بها فى منزلها ووجدت الخرز وبدأت تصنع منه مشغولات يدوية رائعة الجمال وسوّقت منتجاتها واستطاعت تصدير بعض من أعمالها للسعودية والأردن.. إنها الشيماء سعد مصممة المشغولات اليدوية بالخرز الكريستال.

وتقول الشيماء سعد ذات الـ 32 عاماً خريجة كلية الحقوق: «بدأ معايا الموضوع اما خلصت كلية قدمت فى وظائف كتير ومفيش فرصة جت كنت بشتغل فى حضانات مش بحب التكاسل ولا القاعدة فى البيت بحب دايما اعتمد على نفسى واتخطبت وطلعت فى دماغى انى اعمل مفروشات شقتى بالخرز زى المفارش اللى ماما كانت عاملاها لنفسها بالكروشيه زمان وفضلنا طول حياتنا مبسوطين بيهم لأنهم من ايديها حبيت أن شقتى يكون فيها حاجة انا عاملاها بإيدي، لفت نظرى الخرز بجماله وألوانه قررت أعمل مفارش بالخرز حاجة شيك وجديدة ومفيش حد عاملها وكمان هوفر شوية عن المفروشات الهندى والتركى وقتها».

وتكمل «دخلت على اليوتيوب بدأت اتعلم الغرز واحدة واحدة عرفت الخامات بتيجى من فين كان بيشجعنى فى وقتها خطيبى اللى هو جوزى حاليا كان بينزل معايا اسكندرية نجيب خامات وبعدين لفت نظرى فانوس ميداليا صغير فى المحل اللى بجيب منه اشتريته لابن اختى وأما رجعت البيت صممت اشوف هو معمول ازاى عرفت عدده وطريقته من شكله نفذت عليه واحد أكبر شوية خطيبي بقى قالى خلاص جهزي فوانيس وبالفعل جهزت دفعة فوانيس وهو سوقها على صحابه فى الشغل ودي كانت البداية وأوقات كنت ببقى تعبانة هو ينزل يجيب الخامات بدالي شجعني كتير ووقف جمبي ولسة بيدعمني».

وتضيف الشيماء سعد قررت احتراف المهنة وأن أصبح مصممة مشغولات يدوية بالخرز الكريستال وقمت بتدشين صفحة على الموقع الاجتماعى الفيس بوك لتسويق منتجاتى وفى فترة قصيرة أصبح لدى الكثير من العملاء بل وأيضاً ذاع صيتى ولدى عملاء من بعض الدول العربية مثل السعودية والأردن، وتكمل «أنا دايما حاسة أن الناس سندى وظهرى هما اللى شجعونى ووثقوا فى شغلى شغلى اتطور ونجح بفضل عملائى اللى ادونى الثقة انى اشتغل الشغل دا، الاوردرات زادت عليا وانا نفسى شغلي يبقى متوفر فوري في أماكن كتير مش بس عرض وطلب لا يبقى مشاهدة وشراء وقررت أعلم بنات كمان فن المشغولات اليدوية بالخرز الكريستال».

وتقول «انا دلوقت مش مجرد انى بشتغل خرز وخلاص لا انا بقيت بعشق الخرز وريحته والواناته الخرز شغفى فى الحياة على اد تعبى فى القطعة اللى بطلعها على اد انها لما تخلص واشوفها قدامى كدا ببقى مبسوطة اوى وبنسى اى تعب».

وعن أحلامها للمستقبل تقول الشيماء سعد مصممة المشغولات اليدوية بالخرز الكريستال «نفسى نوقف نستورد اكسسوارات منازل من خارج مصر ، فى فنانين وفنانات كتير فى مصر مش بس الكريستال فى كل المجالات إبداع ملوش حل ولا وصف ونفسى يبقى كريستال الشيماء فى كل بيت فى العالم نفسى يبقى فى كل محافظة تسويق لشغل الكريستال حاليا بعلم بنات معايا وبيشتغلوا ويساعدونى بأجر ونفسى ابقى سبب فى فتح أبواب رزق كتير ونفسى كريستال الشيماء يبقى براند عالمي.»