الأربعاء، 10 يناير 2024 - 10:42 م

إيه اللى انت لابسه فى عز الشتا ده ياسى السيد،هدوم صيفى وفى طوبة، سلامة عقلك ياخويا؟!

ماتتلمى يا أمينة ع الصبح بدال ما أصبّحك بقلمين!

انت مش واخد بالك من لبسك ولا إيه وفين الجبة والطربوش، اللى يشوفك يقول رايح تلعب ماتش كورة!

وفيها إيه يعنى طول عمرى رياضى ومهتم بنفسى مش زى ناس!

بطل تلقيح كلام وخش غير الهدوم دى لأنك لو نزلت الشارع كده الناس هتطلبلك السرايا الصفراء!

والله وجه اليوم إللى سى السيد بجلالة قدره ياخد أوامره من الحُرمة بتاعته!

مش عايزة الناس تضحك عليك وتقول الراجل الخمسينى فاكر نفسه عيل صغير.

خمسين عفريت لما يركبوكى، إياك تنطقى الكلمة دى تانى،، قال خمسينى قال، مش أحسن منك اللى فى الأربعينيات والناس فاكراكى سبعين؟!

ما هو من الهم بتاعك وبتاع عيالك.. هو الحق عليا يعنى اللى ضيعت عمرى وشبابى فى خدمتكم وتحت رجليكم؟!

طب بطلى وحياتك دور أمينة رزق ده وقومى اسلقيلى بيضتين تلاتة وحطيهم فى سمنة بلدى وهاتيلى شوب حليب خلينى ألحق الماتش!

ماتش إيه ده ياخويا، يكونش اختاروك تسافر مع المنتخب ابدنجان اللى فى كوم تلتوار؟!

ههههههه الله يحظك يا أمينة اسمها أبيدجان عاصمة كوت ديفوار، ده مخك انتى اللى بدنجان، عموماً أنا فعلاً رايح ألعب ماتش بس مع زمايلى التجار فى بين القصرين!

ماتش إيه يا راجل ده انت بقالك ييجى خمستاشر سنة بتلعب فى الوقت الضايع ومستنى صفارة الحكم!

بلاش حئد يا أمينة وقومى بخرينى من شر حاسد إذا حسد، أنا اللى يشوفنى مايدينيش أكتر من أربعين سنة. وانا بصراحة عمرى ما حسيت أنى عديت الخمسين ولا حتى الأربعين يا أمينة!

طبعا تحس انك كبرت إزاى وإنت قاعد طول اليوم على الفيس بوك تشيّت حبة مع الست جليلة وتتزغرن حبة مع الست زبيدة العوالم بتوعك، الرك والباقى على اللى قضت عمرها فى المطبخ تعلف وتأكل وتزغط!

يا دى زبيدة وجليلة اللى حاطاهم فوق دماغك وزاعقة، قلتلك مليون مرة دى جروبات رجالى وكلهم من التجار اللى معانا فى الرابطة.

ألا بصحيح فكرتنى، مش تقول للتجار دول يا سى السيد يلايموها شوية وعيب عليهم إللى بيعملوه فى الأسعار ده، يا راجل ده احنا بنشترى الحاجة الصبح بسعر وعلى ما ييجى الليل الأسعار بتفط زى ما يكون راكبها عفريت!

اللهم طولك يا روح، يا ولية انتى إيش فهمك فى آليات السوق!

طب ماتفهمنى تطلع إيه آليات السوء دى ياخويا بدال مانت عايز تجرى تلعب مع تجار السوء زمايلك دول؟!

احترمى نفسك يا أمينة وبلاش تسدى نفسى لأن النهاردة عندنا ماتش مهم مع فريق المستهلكين واللى هيكسب هيلعب على النهائى!

اللى يشوفك يقول فشر محمد صلاح الله يحرسه،، ويطلع إيه كمان فريق المستهترين دول؟!

ههههههه المستهلكين مش المستهترين يا أمينة، عموما ببساطة كده آليات السوق معناها العرض والطلب.

فى عرضك تكلمنى كلام أفهمه مش من كلام الجرايد!

حاضر لما ارجع بس ادعيلى لأنى حلمت حلم وحش ومتشائم!

خير يا خويا كفى الله الشر؟!

حلمت إنى بالعب نهائى كاس العالم وكنا متعادلين مع فريق البرازيل و...

استنى استنى البرازيل البرازيل بتاعة بيليه وكاكا والناس دى؟!

أما عجايب يا أمينة يعنى عارفة بيليه وكاكا ومش عارفة اقتصاديات السوق؟

ماتغيرش الموضوع وجاوبنى بتلاعبوا البرازيل ازاى يعنى؟

البرازيل يعنى فريق تجار البن البرازيلى وفى آخر دقيقة من الماتش الحاج أنور اللبان عملى باص قمت عملت سبرنت وانفردت بالجون وحطيتها فى المقص، بس يا خسارة!

إيه صحيت من النوم يا خويا؟

لا حكم الفار منه لله لغى الجون يا أمينة!