صفوت ناصف

الثلاثاء، 25 يونيو 2024 - 05:05 م

 

كتير باسْرح قصاد الحبر

كتير باتمنى أكون جوّاه..

يجوز أعرف كلام غير اللي على بالي،

يجوز في الحبر رَدّ أكيد على سْؤالي

بإني ازاي بقيت ضدّ اللي باتمناه!

 

حلمت كتير أكون جندي

ودلوقتي كرهت الحرب

زمان الحلم دا فاتني فعشت بدونه فاقد قلب

ودلوقتي..

باشوف العمر بيعدّي..

أحس بإني ما حْلمتش وعايش نفس أثر الضرب

كإني صورة مطفيّة لواحد مات

وصارت للبارود مراماه

كبرت وسبت واد أخضر

بيحفظ صم إسم أبوه

ومش متخيل انه يموت

يضيع مغزاه

 

بياخد في العزا بالدمع مش بالإيد

باشوفه من بعيد لبعيد

كإنه ملمس المَيَّة

إذا الذكرى رمّت طوبة..

بتنزل سهم على قلبه

تعكَّر كل شيء جُوّاه

 

بموت والدي..

كإن البيت ما لوش ترباس

يبور الضحك لو ما طلعش من صوتك

ضحكت لوحدي فاتفتّت

جدور الزرع من بعدك نست ملمس إيديك نشفت

وانا بعدك كإني جزيرة سابها المد وسط الملح فاتّاكلت

كإني "لامبو"[1]واتردّت في روحه الآه

 

وأكل اُمّي نقِص طعمَك، وكل ما يتعمل بايت

كإن حلاوة الأكلة عشان كنّا بنستناه

أبويَ جايّ من شغله، وريحْةِ الأكل جايّة معاه

أنا وهدومه دلوقتي نسينا كلمة اتدفّيت

أبويَ شمس ع الضيّق

وغابت عند شرق البيت

وباب الأوضة من بعده بقى يزيّق

كإن الشقة في غيابه طِلِع لها حسّ

عشان يمكن ما هيش سمعاه؟

وحتى الحيطة مش قابلة صاحبها يغيب ويتبروز

ما بالك لو شريط أسود حبس روحها

وخلي الدمع إجباري على العايشين

أبويَ لمَّ حشرجته من التدخين

وسابني سيجارة مطفية

لا هو شربني ولا شربته

أبويَ بطّل الدخان عشان عمره يزيد باللمة وسطينا

لكن دخانه ما تركهوش كإنه ستارة بتحاول تداري شعرة من شيبته

كإنه الباقي من عمره ونفَخه في الهوا جايز يطلّع م الرئة كبْته

يجوز رص الحجر يخجل يبيّن إن موته نداه

 

بسبب الموت خلف وعده:

"وانا عايش ما فيش حاجة هتحصل لك"

ودلوقتي

هاخلي الحاجة تحصل لي

ما خدتش حصِّةِ الدنيا على إيده

ولم يشرح لي درس ازاي بتِحْرِت روح وتزرعها

فتطرح بيت، فتحصد عيّلك جواه

أبويا زي ما رواني بميّة ضحكته العذبة رواني بكاه

أكيد جَفّت صُحُف والدي..

بِعكس دموعي لمّا بتجري على قلبي..

عشان تلقاه

وتثبت إني شيء منه

وتثبت إنّ شيء منّي دفنتُه معاه.