الخميس، 02 ديسمبر 2021 - 06:32 م

آه ياكيروش آه .. طيرنا حسام البدرى وجبناك بدولارات كتيرة  تملى فدان زكايب .. وانتظرنا شهور كتير يمكن الحال يتعدل فى المنتخب ويستقيم ..

صبرنا على النتايج الضعيفة والاداء  (المهربد) والعشوائية الحاضرة رغم وجود النجوم الساطعة ..

صلاح وقفشة والسولية والشناوى ، وقولنا الخواجة لسة بيدور على سر الخلطة ياخوفى ليجيلى منه جلطة بسبب تدريبه  الاونطة ..

ولحد كده قولت ياواد انتظر شوية كلها ايام وتبدأ البطولة العربية جمهور كثيف وغفير من كل الجنسيات واطياف بلدنا فى الغربة منتظرين ترتفع روحهم المعنوية بانتصارات المنتخب المدوية وانه البطولة العربية العائدة فى ثوبها الجديد الكاف بتاعها عينة (ومهواش) بعيد ..

والمباريات سهلة وفى المتناول لبنان والسودان حبايبنا والجزائر كمان يصعد اول وتانى وندور على من يصعد بعد كده للدور التالى بدأنا بلبنان ياخوانا دول حبايبنا وبلد جميل ومالوش فى الكورة نصيب  دول لو لعبونا بمنتخب السلة بتاعهم هيتعبونا  لكن عمنا كيروش نزل المباراة بدون خطة وبدون ترتيب العب ياواد انت وهو الكورة لقدام أمامكم منتخب صيدة كل واحد فى الفريق عايز منه جول ، مهواش معقول نلاعب فريق جديد فى تكوينه ومن غير ما نسجل حتى نصف دستة واللى عايز يزود  يزود  مفيش مانع بس نخلى بالنا حتى منزودش فى عيار التهديف ومنتخب لبنان طيب وأمامه مستقبل قريب ..

بس ياخسارة المنتخب جاب هدف واحد بالقطارة يعنى بالعبارة بضربة جزاء للواد الموهوب قفشة حبيب القلوب والمستوى (مهربد) والفريق كله تايه والجمهور المصرى الكبير والغفير خرج من المباراة حزين ومضايق ..

ولسان حاله يقول هو ده منتخبنا هو ده منتخبنا ، هو ده الفريق اللى عايزينه يوصل كأس العالم  ياعالم فاته صلاح فالمنتخب من غيره ضايع وتايه.