السبت، 27 أغسطس 2022 - 08:55 م

محمد صلاح

تلقيت دعوة من عم ضم ضم لحضور حفل الفنان على الحجار، بمهرجان القلعة الدولى للموسيقى والغناء، بدورته الثلاثين، والذى يقام بمسرح المحكى بقلعة صلاح الدين، وبالفعل التقيت مع عم ضم ضم وبعض رفاقه، انطلقنا فى طريقنا قاصدين قلعة صلاح الدين، الجميع ينظر إلى الطريق، الكبارى، فى انبهار ودهشة.

أنا: فى حاجة يا عم ضم ضم؟
عم ضم ضم: هو أنت رايح فين؟
أنا: رايحين القلعة، مسرح المحكى، هو أنت مش عازمنا على حفلة على الحجار.
عم ضم ضم: انت متأكد إن ده الطريق، انت عارف إن آخر مرة مشيت من طريق القلعة كان من خمس سنوات، بس مكانش من الطريق ده.
أنا: لأ يا عم ضم ضم هو ده الطريق، على فكرة أنا كنت معاك من خمس سنوات، لما كنا رايحين مسجد السلطان حسن، فاكر.
عم ضم ضم: فعلًا، دى آخر مرة، هو الطريق اتغير كتير، مفيش زحمة، الطريق وسع، إيه الجمال ده، إيه الحلاوة دى - سكت عم ضم ضم قليلاً، ثم تحدث بانفعال - الكلام ده مش نافع، أنا كل كام يوم هروح مكان، هرجع ألف تانى، أشوف التغيير ده، الشوارع بقت غير الأول، كبارى جديدة، طرق سريعة، طب الحى عندنا اكمننا شايفين التطوير فيه يوم بيوم مش حسّين بغربة عنه.

«وصلنا إلى مسرح المحكى بالقلعة، استقر كل منا بمكانه، بدأ الفنان على الحجار يشدو أروع وأجمل أغانيه».
أخذت أنظر حولى لأجد جمهورًا كبيرًا جداً، من كل الفئات العمرية، الجد والجدة، الأب والأم، الشباب والصبية، الكل يستمع بشغف إلى أنغام الفن الجيد.
فعلًا الفن الجيد هو الذى يستمر ويعيش.

والأجمل هو إحساسنا بالأمن والأمان فى بلدنا الغالية.
يحيا كل من يحافظ على الأمن والأمان، وتحيا مصر.