السبت، 11 فبراير 2023 - 04:01 م

قلت له:
ما تنفخش صدرك فى وش الريح
حتطبَّقه وما ترميش ورقك فوق ترابيزة بيسنُّوا عليها سنانهم
قلت له:
المزّيكا مش حتنفعك
وقت ما يكسروا بابك عليك
ويدقوا راسك فى الحيطة
ودمك يمسح أثر قصايدك الباهت
فى اللى يسوى واللى ما يسواش
قلت له:
بلادك فى جيبك
وقلبك براحته
يناكف حبيبك
ويكره صراحته
ولما يسيبك
حتتمنى ريحته
قلت له:
اللى بينك وبينها
زى نوَّة فسدت
زى مراجيح دابت حبالها
ومستنية الواد المسكين
اللى حترفعه للسما لحظة
وتهبده الهُدر المتين
زى طيف خفيف أليف
بييجى يشقَّر عليك فى الحلم كل ليلة
وانت مصمم تقابله ع القهوة كل يوم
قلت له:
مرَّة زمان
حبِّيت واحدة أجمل من خيالك
وما قولتلهاش
ومرَّة مش من زمان
حبِّيت واحدة أجمل من خيالى
وقولتلها
بس هى سابتني
وعاشت فى خيالك
وأنا دلوقت حاسيبك وأموت
فى خيالى.

اقرأ ايضاً| الحب من أول شطرة