أخبار الأدب

السبت، 08 أبريل 2023 - 03:31 م

أنا عاوزه اشرح لك إحساسى..

احنا اتعدينا حدودنا،

مش عارفة أرجع وأعيش بطبيعتى،

حاسّه إن أنا أسوأ إنسانة.. على وجه الأرض،

حسستنى إنّى رخيصة، عاوزة أقولك حاجة..

انا روّحت لاقيت عندى ال..

كان جسمى وعقلى فى ثورة

حاسّه إن أنا مش مبسوطة

باين على وشّى قوة..

مع إنّى بحاول أضحك ،

حاسّه إن حاجات اتكسرت بينّا ،

حسيت فجأة إن أنا باكدب على نفسه ،

كان نفسى أقف وما اكمّلش ،

انا كنت سعيدة..

 لمّا اتمشينا مع بعض ،

لكن المرّه دة..

ضاع منّى حاجات.

مهما تقول وتبرّر

مش هاقدر أسامح نفسى

اتكسرت عِزة نفسى

مش عارفة انا ليه باكسر نفسى

حاسّه إن انا هاتعذب باللحظات دى

مش هاعرف ابص فى وشّك تانى

انا ذنبى كبير..ندمان..؟

لو هاطلب منّك نتقابل تانى..

 هترفض؟!

حبّيت الدنيا اللى انت بتخلقها

أجمل إحساس إنّى انسى الدنيا

 وانا فى حضنك..

إحساس عمرى ما حسّيته

حاسّه إن ده ذنبى انا..

وانا اللى عليّه الوزر مش انت

انا آسفة..

كان المفروض لمّا نشوف بعض

 نكون أسعد ناس فى الكون

لكن اللى حصل بالعكس

انا مش من حقى سعادتى معاك

انا روحى صحيح ملكك

لكن مش جسمى..

نفسى تكون فعلا ملكى..

لكن حسّاها خيانة

حاسّة إن انا مش من حقى

ولا حتى الحضن

عمرى ما حبيت سرقة حاجة

مش ليّه..!

لكن حضنك مش ندمانه انّى أخدته

وكإنّك إبنى..

أو حد هياخدك منّى..!

لحظاتى معاك مسروقة من الدنيا

كان نفسى لُقانا يكون أطول

احنا عملنا جريمة..!

حسيت إحساس عمرى ما حسيته

صدقنى تعبت..

قولت كلام.. دوّب قلبى

حاسّه انّى باخونك..

وباخون الناس حواليّه

كان نفسى أحس الفرحة

وانت معايا..

كل الأحاسيس نقصاك

حاسّه إن كلامك ليّه

بتحاول ترضينى!

مش عارفه انا مالى؟!

حاسّه انّى جرحت شعور نفسى

حاسّه إن الحِمل تقيل

حاسّه إنى عروسة «باربى»

وبيلعبوا بيها شويّة أطفال

الناس بتحركنى..

وماليش أى إرادة

آسفه انّى جرحتك بكلامى

حضنك طبطب على كل جروحى

كان صعب عليّه اعرف بوجودك

وما اجيش اشوفك..

انا دايما اضعف قدّامك

جوّايا ضحكة..

نفسى اضحكها لك

جوّايا بُكا..

عاوزة فى حضنك أبكيه

انا مليانه وجع..

مش قادرة احكيه لغيرك

انا لسّه بحاول افسّر علاقتنا..

عارف معناه إيه..

حاجه منّك تفضل جوايا؟!

خايفه انّك تندم على يوم ما قابلتك

تعرف إنّى حلمت امبارح بيك؟!

وانّى نزلت أقابلك فى معادنا..

وما كنتش عارفه ألاقيك!

وفضلت الف والف عليك

وانا مش عارفه انا فين..!

عضلات رجليّه كانت تعبانة

بس باحب الكعب العالى.

اقرأ أيضاً| منى عبد الكريم تكتب : مقام طه القرنى فى محبة التراث الشعبى