بوابة أخبار اليوم

الأحد، 16 يوليه 2023 - 11:37 ص

صَبَح الصَّبَاح سَعْد وهنا

يابَحر عِشْقَك دندنة

من كام سنة

جيتلك جريح

وباجُر خُفِّي ضد ريح

من غربة كانت مَطْحنة

آدي  اللي فاضل مننا

آخر لقى  بيني وبينك كان هنا

نبدي بسلام  !!!

نسمع لصفارة ترام

ونْبُصْ على همس العيال

عاملين لي حبِّيبَة غرام

من غير كلام

نجري ويضحك سِنِّنا

بتقولي إيه!!!! فكرني بيه

ايوة بصحيح

كلامنا كان عن مركبة

مرت وشايلة  ف بطنها

سوء ظنها

مع إنها

عايش عليها ناس كتير

م الطيبين

وناس وعايشة سفلقة 

اسمع بقاااا

ولا بَصْ كان ولا بَحْلَقَة

قُصْر الكلام قبل اما تِسْرَح مني

ويضيع الكلام

نرجع مقام المَنْكَبَة

للمركبة

كانت عجوزة مكركبة 

كُهْنَة  حديد ..عودها الشديد

عجز و دايب م الصدا

خاوي على الجزع الجريد

والغاوي هوة المستفيد

طبَّال ومادد نص إيد

ونقول كمان

حكم الزمن ..حكم القضا

حلَّابَة  غَشِّت ف الضمير

حواليها واتلموا الكتير 

واتجمعوا

هُسْ اسمعوا

ماهي صيتها واصل للسما

آة وربنا

بس إنما

على صوت كمان

زي الهوا

لحن لبليغ

والبحر يعشق صوت حليم

ونغني لو جانا هوى

ونقول ياشِعر المُغرَمين

أحدف  شمال 

أحدف يمين مش قصتي

القصة واصلة

يا محترم

سفح الهرم

والكل بيسقف  سكات

وتقولي قال دة ضمير ومات!!!!

احنا اللي بنموت مرحلة

تلامذة لسة بمريلة

 والهيصة لابسه على الضمير

توب  معيلة

قصره البيوت ….بتلم ياما طعم موت

ياعم فووووت

من امتى  ياسليل الجمال

كان للغزالة ف موتها صوت

من امتى واحنا بنندبح

وهبولنا فرصة للنجاه

الحكمة بس ف شرعهم

بيموت إله و يعيش إله

ياألف آه

كل اللي عقله بيشتغل

في المنفى أخدوه

اشتباه

كل اللي مصفوف ميمنة

ضد الحياة