صفوت ناصف

السبت، 05 أغسطس 2023 - 04:53 م

أحلى حاجه ان انت تلقى

حد مره يحس بيك

حد يسمع لما تشكي

يمسح الدمعه ف عينيك

حد ياخدك جوه حضنه

لما تحزن تلقي حزنه

تلقي ايده بدون ما تطلب

جايه بتطبطب عليك

......

حد بيزوق طريقكوا

بالعبير ويا الندا

حد قبل ما تنده انت

تلقي قلبه عليك ندا

واما بترد ف جمايله

يبقي هو اللي ابتدا

...

حد ما بيزهقش منك

لو تروح له مرتين

حد لما تشكي همك

تلقي قلب وتلقي عين

حد لما تمر ضيقه

هو يبقالك موعين

حد ينصح وبآمانه

حد ينفع يبقي صالح

حد مش محتاج إعانه

أو مصاحبك للمصالح

.....

حد بيواسي في جنابك

لما تشعر أي ضيق

حد يحزن ع اللي نابك

مش يسيبك ف الطريق

حد لو تفتح له بابك

يبقي ليك نعمه الصديق

.....

حد فعلا يعني ممكن

يحفظ السر بآمان

حد يشبة للمسكن

لما يبليك الزمان

حد قلبه قلب صافي

حد عمره ما يبقي جافي

حد عمره ما كان أناني

أو يبيعك مهما كان

.....

حد يسأل لو تغيب

حد يفهم في الحوار

حد يبقالك حبيب

مش يادوب رافع شعار

حد لما الليل يجيلك

هو يبقي لك نهار

.....

لو لقيته ابقي قولي

قبل ما يفوت الأوان

 

اللي قلته حاجه نادره

حاجه نقصت من زمان