صفوت ناصف

الجمعة، 01 سبتمبر 2023 - 11:45 م

 

 «انت مين» قصيدة للشاعر بهي الدين عبداللطيف

 

كنت شايفك شىء بديع

وانت حتة لحمه حمرا

وامك النايمه على سرير الولاده

وشها بينطق سعادة

واما ستك جت تشوفك

نورت يومها العيادة

بالزغاريد  والزياط

كنت فرحه للجميع

كنت ورقة خص خضره

وكان مخاطره....

إنى اشيلك أو أبوسك

ولما بتطلع سنان

كنت تسخن

واحنا كنا معاك بنسخن

واما تضحك

كنا نضحك

واما تمشى

تسندك روحنا وقلوبنا

وتشاركنا الحيطه وحروف الكراسى

وان وقعت...

اترعب وأقول يا راسى

كنت اراقبك وانت بتذاكر دروسك

والأمل كان بيداعبنى

بكره يبقى شيء عظيم

وافتخر واقول دا ابنى

كنا بنحافظ على لعبك وحصالة فلوسك

ولسه ولحد النهارده

بافتكر أرقام جلوسك

كنت جندي من جنودك

فى الشدايد سيف ودرع

فى الفرح خادم وتابع

كنت ليا عمر تاني

امتداده من وجودك

انهارده بعد أحداث السنين

بابقى نفسى أسألك....

انت مين؟؟؟؟؟؟؟؟؟!!!!!

اقرأ أيضا | بعد رحيله.. 5 معلومات عن الشاعر كريم العراقي