الأربعاء، 20 سبتمبر 2023 - 08:59 م

ميت ألف فرصة عشان أسيب مصر ولا عمرى سبتها.. علشان هى بلادى اللى بجد بحبها .. بحبها بكدبها وصدقها .. بحب فيها السهر بحب زيفها وأصلها .. بحب فيها طلعة الشمس تنور وشها.. بحب فيها القمر طالع يغازل حسنها .. بحب فيها المشى على شط نيلها وبحرها .. بحب فيها بناتها راسمين ملامح شعبها.. دى بنت مايصه وحاطه ورده فـ شعرها.. ودى بنت جد ونازله جرى لشغلها.. هتلاقى فين بلد فيها الكنايس والجوامع بتحضن بعضها.. مسلم مسيحى إخوات راضعين طيبه من صدرها.. نبع الحنان ويناموا حاضنين أرضها.. هتلاقى فين تانى بلد كل حاجه فيها تخليك تحبها.. هتقولى ظالمة هقولك برضو بحبها .. هتقولى زحمة هقولك علشان بنعشق أرضها ..جرب كده تسهر ولو وحدك على ضف نيلها وحبها .. جرب تشوف بنت حلوة مع شاب واقف جمبها.. بيحبها شايل فى قلبه هموم الدنيا كلها وبرضو بيحبها.. جرب كده تاكل درة وترمس على شطها .. وتشوف وشوش الناس وإضحك زيها.. طب وإنت ماشى لوحدك ووقعت فى مشكلة مش بتلاقى ألف واحد جمبك بيحلها .. لا تعرفهم ولا يعرفوك بس جمعكم حبها. 

صلاح جاهين