الخميس، 13 يناير 2022 - 06:43 م

أيها السادة شربنا تخاريف عمنا كيروش سادة.. الراجل بيفكرنى بفيلم ٤/٢/٤ للفنان طيب الذكر الراحل سمير غانم.. كيروش لعب بنفس الطريقة السماروية لا دفاع ولا هجوم أمام نيجيريا..

أى والله ليس هذا منتخبنا الذى نعرفه.. غير وبدل فى مراكز اللاعبين خلى صلاح رأس حربة ولعب مصطفى محمد جناح يمين وكان ناقص يلاعب محمد الشناوى باك يمين بعد إصابة أكرم توفيق الباك يمين.. الراجل البرتغالى نسى الكرة وحرق دمنا حرق دم ١٠٠ مليون مصرى ..

وقلنا كتير فى نفس المنبر هذا إن كيروش فنكوش.. طول المباراة مافيش هجمة عدلة للمنتخب..

ياعم كيروش ماحدش قال لك إن المنتخب سيد أفريقيا وحاصل على البطولة الأفريقية سبع مرات.. الجمهور المصرى يضرب كفاً على آخر من افتكاسات المدرب اللى دائما بيبرر الخسارة أنه جاء لإعداد فريق لكأس العالم.. ياعالم هو ده مدرب يقدر يوصل كأس العالم  ولاحتى كأس بركة السبع.

>> تحمل الدفاع والحارس الشناوى عبء المباراة وكان نسور نيجيريا على قدر المسئولية ونجح الشناوى فى تخفيف حدة الخسارة عند هدف واحد ولولاه لكانت المباراة انتهت بفضيحة مدوية..

تعرفوا إن منتخبنا طول عمره متوفق على نيجيريا لكن الخواجة غير المفاهيم فى الكرة..

فى بطولة ٢٠٠٨ فزنا على نيجيريا بثلاثة أهداف مقابل هدف فى زمن المعلم الكبير حسن شحاتة وجيل أبوتريكة وأحمد حسن وعمر زكى ومتعب وزيدان. وأصبح الأمل إن ربنا ينفخ فى صورة اللاعبين ويحققوا الفوز على غينيا بيساو ثم على السودان وربنا يصلح الحال..

وبعدها ممكن نلاقى كلام يتقال. مطلوب من اتحاد الكرة أن يجلس مع اللاعبين ويقول لهم إنهم بيلعبوا بفانلة منتخب مصر مش فى تقسيمة  فى دورة رمضانية.

>> واثق فى جدعنة ولاد بلدى لكن خايف من تخاريف الخواجة كيروش ..يارب تاخدك نومة وتصحى مع صفارة الحكم.. حتى الفريق يفوز.