الثلاثاء، 11 أكتوبر 2022 - 05:56 م

بقلم: مديحة عزب

«بيقولوا علينا مطبلاتية، لكن شوف المنطق بتاعهم.. لو اتكلمت عن مشروعات حتتعمل حنقولك فنكوش ولو نفذتها حنتهمك بإهدار المال العام.. لو قيمة الجنيه نزلت يبقى بتتلاعب بالعملة الأجنبية ونتهمك بالفشل ولو قيمته ارتفعت حنقول انها لعبة منك.. تمام زى ما أعلنت من سنين إنك حتعمل مشروع قناة السويس الجديدة قلنالك دى ترعة، ولما نجحت قلنالك ده مشروع قديم وانت سرقت فكرته.. حنضرب لك الأكمنة وحنتهمك بالفشل الأمنى ولو حصلت مواجهة وقتلت إرهابيين حنتهمك بتصفية المعارضة..

حنبعت عيالنا لداعش ونتهمك بإخفائهم قسريا ولو انكشفوا واتفضحوا حنقول انهم انضموا لداعش بسبب حكمك.. حننشر إشاعات ونحرض الناس على البلد فى برامجنا وصفحاتنا ولو حاسبتنا حنتهمك بتكميم الأفواه والاعتداء على حقوق الإنسان.. ولو إعلامك رد على اشاعاتنا حنقول ده تطبيل.. ولو الإعلام الغربى قال كلام إيجابى فى حق البلد حنقولك ده انت دافع لهم ولو قال كلام سلبى حنقولك فضحتنا قدام العالم..

حنصور لك الفقرا فى العشوائيات ونقولك فين العدالة الاجتماعية، ولما تنقلهم لأبراج سكنية جاهزة ومفروشة وتعمل لهم محلات تجارية حنتهمك بالتهجير القسرى والضحك على الغلابة..
لو بنيت مسجد حنقولك بطون المسلمين أولى ولو هدمت مسجد عشان توسع الطريق على الناس حنتهمك بمعاداة الإسلام وبهدم بيوت الله.. لو عملت مدن جديدة حنقولك الناس عيانة عايزة تتعالج، ولو عملت حملات طبية مجانا لعلاج الناس حنقول انها هجص فى هجص لكن لو الناس اتعالجت فعلا حنقول إن الأمم المتحدة هى اللى عملت الحملات الطبية دى.. لو اتعاملت مع الخبراء حنقول اسمعوا الشباب ولو اجتمعت بالشباب عشان تسمعهم حنقول انك لامم حواليك المطبلاتية..

لو هيئة السكة الحديد خربانة وبتخسر حنتهمك بالتستر على الفساد ولو شددت عليها الرقابة وبدأت تحقق أرباح أو لو حاولت تطورها حنقولك ده من جيوب الغلابة.. لو رديت على حد شن عليك وشوشر عليك بالشائعات حنقول إنك بترد عشان خايف منه ولو مارديتش عليه ولا عبّرته حنقول إنك مش قادر ترد.. يعنى بالمختصر المفيد أى خير حتعمله حنشيطنه وحنصوره للناس على إنه شر، وأى شر احنا حنعمله حنلبسه توب الدين..

ذلك عزيزى القارئ كان عبارة عن فيديو قصير مدته أقل من ثلاث دقائق شاهدته بالصدفة على الفيس بوك صاحبه مواطن مصرى للأسف لم يعلن عن اسمه أو ربما كان جزءا من حوار تليفزيونى تم اختزاله فى هذا الجزء الذى شاهدناه فى الفيديو.. هذا المواطن يحب بلده ويريد أن ينبه الناس للمنطق القذر الذى ينتهجه كارهو هذا الوطن فى التعامل مع القضايا فى مصر والذى بمقتضاه يتم شيطنة أى فعل من الرئيس السيسى أو من الحكومة المصرية، وإهالة التراب على أى إنجاز يتم تحقيقه على الأرض وتصوير الأمور بغير حقيقتها على الإطلاق بحيث لو رأت الإدارة المصرية أن الصواب هو اختيار أمر ما فى أى قضية من القضايا سارع الخونة فى معارضتها والتأكيد بأن الاتجاه المعاكس كان هو الأصوب.. قاتلهم الله أنّى يؤفكون..
الخلاصة إنك عزيزى القارئ كمواطن مصرى وكما قال صاحب الفيديو لابد أن تفهم أنك وبلدك وجيشك ونظامك «بتتحاربوا من عدو خسيس ومعدوم الدين والضمير»..
دعمك لوطنك هو رصاصة فى قلب كل خائن و حاقد وحاسد وكاره ومتآمر..
ما قل ودل:
محدش بيتعلم من تجارب الناس، كل واحد بيحب ياخد على قفاه بمجهوده الشخصى..