الجمعة، 28 أكتوبر 2022 - 05:40 م

الحياة ألبوم صور مليان ذكريات حلوة ومواقف صعب تنساها.. مشاعر وأحاسيس بتفضل عايشة معانا وجوانا بنفتكرها لما نحن لماضينا.. عمر بيجرى بينا وبنكبر وبتكبر معانا المسئولية ومشاكل الحياة اليومية.. شعر أبيض فى سن الأربعين بيعبر عن حالة مركبة ما بين عمر بيجرى وضغوط كتير خلتنا منفكرش غير فى اللى حوالينا وننسى نفسنا.. معادلة صعبة ما بين انك ترضى الناس اللى بتحبهم وتيجى على حساب نفسك وصحتك وما بين انك تفكر فى مصلحتك وتاخد بالك من نفسك.. والسؤال يا ترى ممكن نحقق المعادلة الصعبة دي؟.

الإجابة بكل تأكيد «نعم» نقدر.. طب ازاى؟ ببساطة «كن نفسك».. متحاولش تكون صورة من احد.. كن نفسك فى كل مواقفك ومشاعرك وعواطفك وأحاسيسك ولهجتك ومظهرك، كن أنت بملامحك الأصلية وليست المزيفة.. عامل اللى حواليك بأخلاقك وتربيتك وأصلك.. اشتغل على أخطائك وصلحها لان مفيش انسان كامل فى صفاته - الكمال لله وحده - دى حقيقة للأسف كتير منا مش بياخد باله منها والنتيجة بتكون خسارتنا لناس بيحبونا وبيخافوا علينا وعلى مصلحتنا لأننا بنكابر دايما فى الغلط وشايفين نفسنا صح على طول الخط.. وخلى بالك دايما أن ‏تصرفات بعض الناس بتبقى فرصة عظيمة عشان تحمد ربنا على تربيتك وأخلاقك وطريقة تفكيرك وانك تعامل الناس بأخلاقك لا بأخلاقهم مهما كانت تصرفاتهم مؤذية وجارحة.. متتخلاش عن صفاتك الإيجابية وأخلاقك لمجرد إن الآخرين ميستحقوش اهتمامك.. اوعى تندم على أى لحظة أسعدت بها أى أحد حتى ولو أنه لم يكن يستحق كل هذا القدر من الاهتمام.. وإذا كانت بصمة إصبعك تثبت هويتك «الشخصية» فبصمة لسانك تثبت حصاد تربيتك ورقى أخلاقك فاجعل من نفسك أثرا جميلا يطبع فى نفوس البشر.