الجمعة، 25 نوفمبر 2022 - 07:22 م

فرحة جمهور الأهلى ببطولة السوبر رقم ١٢ فى تاريخه ليها طعم خاص بالتأكيد ولاتقل عن فرحتنا بالقاضية التى جاءت بالبطولة التاسعة من دورى أبطال إفريقيا بعد الفوز كالعادة على الغريم التقليدى الزمالك.. بقول كالعادة لأن بالفعل القاعدة بتقول انا الاهلى.. انا اللى دايما كسبان.. انا دايما «سوبر» .. صحيح ممكن تكسبنى فى ماتش او تاخد منى بطولة عادى خالص هو دا حال الكورة. 

السؤال بقى ليه الأهلى سوبر؟! هقولك.. الأهلى سوبر علشان جمهوره عالحلوة والمرة دايما معاه.. فى الخسارة حاضرين وعندهم يقين بأن الأهلى يمرض ولا يموت.. الأهلى بالنسبالهم حياة.. بيروحوا وبيدفعوا ثمن التذكرة من جيبهم الخاص مش بيستنوا حد يدفع لهم أو ينقلهم بأتوبيسات ويعطيهم وجبات.

الأهلى سوبر علشان مجلس إدارته على مدار تاريخ النادى مؤمن بأن الاهلى فوق جميع أبنائه وبيشتغل لمصلحة الأهلى وجماهيره.. الأهلى سوبر علشان تاريخ طويل من الانجازات والبطولات التى لاتنتهى وجعلت قيمة الأهلى التسويقية هى الأعلى والأكبر محليا وعربيا وإفريقيا وخلت المنافس يقول «اشمعنى».. الأهلى سوبر علشان الأرقام لا تكذب ففى آخر عامين وتحديدا من أكتوبر 2020 إلى أكتوبر 2022 الأهلى حقق لقب الدورى موسم 2019-2020 يوم 31 أكتوبر 2020 ودورى أبطال أفريقيا 2020 يوم 27 نوفمبر 2020 وكأس مصر موسم 2019-2020 يوم 5 ديسمبر 2020 وبرونزية كأس العالم للأندية يوم 11 فبراير 2021 والسوبر الأفريقى يوم 28 مايو 2021 .

ودورى أبطال أفريقيا يوم 17 يوليو 2021 والسوبر الأفريقى يوم 24 ديسمبر 2021 وبرونزية كأس العالم للأندية يوم 12 فبراير 2022 والسوبر المصرى يوم 28 أكتوبر 2022 .. يعنى فى ‏آخر سنتين الأهلى حقق ٧ بطولات و٢ برونزية بكأس العالم للأندية.. فى حين أن المنافس حقق ٣ بطولات فقط «٢ دورى وبطولة كأس».