صفوت ناصف

السبت، 13 مايو 2023 - 04:31 م

على شط أحلامنا "

حلوه ملاحتها

طعمه ف أكلتها

أزأز بزيت ولمون واشرب في شربتها

من صغرنا رقصنالك ف الحته واحنا عيال

على طبله وسمسميه يا مرقصه الغربال

آه من جمالك آه يا خلول يا طازه وعال

 

  الجمعه يوم فسحتي

أنا وامي واخواتي

هنروح نزور نينتي

ونشوف هناك خالتي

ويلمنا حضنها

لمسة إيديها حنان

لما تطول خدي

وتبص ف عنيا

وتبوسني من قورتي

 

تفرش لنا حصيره

عليها طبليه

ومشلتته فطيره بسكر وتمريه

وزتونه متفدغه من أحلى زَرَوِيَّه

متملحه ومخزونه فوق ضهر نمليه

والفول بسيريج حار

والغدوه أورديحي راحت عليك يا شبار

 

حاشيالنا نينتي حناجل مليانه بالبطاريخ

ع القراصات نتشاكل أجمل من ميت طبيخ

وبلوعنا ببرنجانه مقليه و فلافله

ولفت لونه جميل مخللاه نينتي أحمر بلون تِفتَه

 

  بيت نينتي له ترسينه

مزروعه كام قصيص

ريحتها ريحه جميله

متزوقه بفوانيس

لمتنا لمه جميله ع البصطه واحنا عيال

نلعب عليه الشايب وكمال بنلعب آل

لو إجه الليل علينا و َتِّمِت خرمس

ننده على نينا تسرج لنا الفتاش

أولمبه سهاري متعمره بالجاز

وبعدها ننزل

ورا بعض نتسلسل

نقف على الأورنه لما العيال تكتر

علشان نِقَسِّمها فريقين بنلعب صَلَّح و نلعب كمان جندر

وبعدها بشويه

نِلِم بعض ف دايره

إيدينا مرصوصه الإيد على التانيه

ونلعب كيلو باميه

ونعاكس القطه العاميه

القطه سيسي بيبسي

إللي لبست قميصي

 

  تبدأ خيوط الفجر

جايبه نسيم البحر

راكب عليها الطير

البط ويا الغُر

طايرين خطوط طوابير

  بداية يوم سعيد

على شط أحلامنا يا أجمل بلاد الكون

يا حبيبتي يا بورسعيد

ناخد لنا ملايه نفرشها على جفنك

و نحط شمسيه على نفس طول رمشك

نلعب ننط الحبل

ننحت عروسة البحر

بالرمله على شطك

ونبل رجلينا

في مية المالح

الميه رايقه جميله

عايمين بنتسابق

 رايحين على جزيره

من بعدها جزيره

ونكبش الطينه

من تحت رجلينا

ونعمل لها غربال من بين صوابعنا

ونشخلل الحلوه

نرقص مع بعضنا و نغني لها و نقوووووووول

طازه وعال يا ام الخلول

حلوه وعال يا ام الخلول