صفوت ناصف

الأربعاء، 16 أغسطس 2023 - 08:19 م

 

أنا عصفور  ..

لحد ما ييجي يوم وابقى ..

من الأسماك

وح اتجنن ..

عشان البحر من غير باب ..

وحبس جماعي في الخنقه ..

ح يتحايل على الركاب

وح يْفَصَّل ويعمل من بكاهم توب

وبدموعهم ح يرفي الكاب

ولو ح افضل كدا عصفور  ..

ح احاول أرسم الشباك

ولو ما عرفتش أعمل في الهوا خرمين ..

ح اغرَّق روحي في الملكوت

ويخلىٰ الجو للبلاب

حوالي كام جناح للحرب

عشان السِلم مش موضه

وباقي كام غريق في الجيب

 عشان بـاسأل عن الأنفال

قل الأنفال ماهيش لينا

ومش ح نسيبها للأغراب

فــما تسيبش اللقا ياخدك

لأبعد شوق

ح ابص لفوق

ح تطلع لي ..

وح انزل لك مسافِةْ ميل

وح ارمي لك جناح مكسور ..

ح تفهمني ..

وتُمْدُد  في السما الأسباب ..

يادوب تطلع ..

أكون نازل ..

وقاطع حبل عشماوي ..

ولابس كاب ..

من التاني اللي بيضلل على روحنا ..

وبيدلل ..

على أوجاع ..

كانت بايته وبقت صابحه

تبان مفزوعه م الفرحه ..

ومستحْيِيَه م الطرحه اللي لابسينها

تركنا البعض من مده ..

يموج في الكل

جعلنا السد بين يأجوج ..

وبين مأجوج ..

مجرد ظل

ويمكن دي نهايه ..

مش مجرد موت ..

وربك دَكَّهَا بدري ..

وعَزَّ وذَل