الجمعة، 08 سبتمبر 2023 - 06:54 م

فى شهر رمضان دخلنا فى نوبة من الضحك على النكتة اللى طلعت فى الفيس بوك بتقول، بمناسبة شهر رمضان لو عاوز دعوة بظهر الغيب ابعت رسالة بـ١٠ جنيهات، ولو عاوز دعوة فى صلاة التراويح ابعت رسالة بـ٢٠ جنيها، ولو عاوز دعوة ببكاء و شحتفة فى العشرة الأواخر ابعت رسالة بـ١٠٠ جنيه!!  لكن أن تجار الدين يحولون النكتة لنصباية بتجيب فلوس ده الجديد!

فخرج علينا نصاب باسم داعية دينى عمل تطبيق على التليفون بيقولك: ادفع ٤ آلاف جنيه بس، أو ابعت ١٣٠ دولار بس،  وانت فى مكانك ونعملك عمرة نيابة عن أحبابك الذين توفوا، أو نيابة عنك لو مريض !!

والناس بدأت تبعت فلوس علشان سيدنا الشيخ النصاب يعملهم عمرة بالوكالة !!

ولولا تدخل السلطات بالقبض عليه، لأطلق فتوى جديدة تقول ادفع ٥ آلاف دولار بس ونحج بالنيابة عنك، وعن حبايبك اللى توفاهم الله، وادفع ٢٠ الف دولار ونبعت حد يتحاسب بالنيابة عنك يوم القيامة!!

ولو دفعت ٣٠ الف دولار بقى نعملك تخفيض فى ذنوبك ! و٤٠ الف دولار تاخد صك بالعتق من النار ! اما لو دفعت ٥٠ الف دولار كاش هتاخد شهادة دخول الجنة لفرد، وبـ ٥٥ الف دولار تدخل الجنة ومعاك واحد من عيلتك! ولن اتفاجأ لو وجدت طوابير طويلة لحجز صكوك دخول الجنة والعتق من النار، طالما ان الكلام طالع من مولانا الشيخ اللى بيضحك علينا بإسم الدين!

وطالما أننا ناس طيبين، و لقطة وماحصلناش فى تصديق النصابين باسم الدين، فقد قررت أنا أيضا الخروج بفكرة جديدة، وهاقدم فرصة عظيمة لأى شخص بيخاف من الحقن، يادوب يدفع ٥٠ جنيه وهناخدها بالنيابة عنه، واللى عاوزة تخس تبعت ١٠٠٠ جنيه ونحرمها من الأكل من خلال مندوب يراقبها وكل ما تقرب من الأكل هتلاقى حد ضربها قلم على وشها !!

وطبعا لن أنسى قبل تنفيذ الفكرة ان أضع طرحة بيضاء على رأسى واقعد على سجادة خضراء وفى ايدى سبحة ألف حبة، علشان الناس تصدق انى داعية دينية، وتؤمن بفكرتى حتى لو كانت نصباية باسم الدين !  .