الأربعاء، 22 نوفمبر 2023 - 09:35 م

لو مكنتيش تسيبى التليفون ده من إيدك وتقومى تعمليلى لقمة أكلها هيبقى نهارك مش فايت يا أمينة .

أحب على إيدك يا سى السيد تسيبنى شوية لغاية أما أشوف حكايات المخرزوميات دى وبعدها أحضرلك الأكل.

مخرزوميات إيه وزفت إيه ده اللى شاغلك فى الهباب الموبايل ده مش فاهم؟!

يوه يا سى السيد هو إنت مش معانا ع الفيس توك وشايف البهدلة اللى احنا متبهدلينها بسبب اللى اسمه مخرزومات ده؟!

ياولية اتعدلى أحسنلك وفهمينى بدال ما اكسّر الموبايل على دماغك واعملك فيها مخرومات.

طب استهدى بالله ياخويا وأنا هافهمك،أصل أنا يا سى السيد بقالى مدة بانزل بوسترات على صفحتى فى الفيس بوك ومش لاقية حد يعبرنى بكونت ولا حتى بنايكي.

ههههههههههه الله يحظك يا أمينة اسمها كومنت ولايك لكن نايكى دى ولا مؤاخذة ماركة كوتشيات وجزم وهجيبهالك تلبسيها فى دماغك يمكن تفوقى من الهباب ده!

ياخويا بلاش تتعصب وسيبنى أفهمك،أنا سألت سى فهمى عن ايه حكاية الفيس بوك وليه معادش حد بيتفاعل معايا فى اللى بانزله راح قالى ان المخروزمات هى السبب.

هههههههههههه ايوه بس خلاص فهمت قصدك الخوارزميات !

يسلم لسانك يا سى السيد، هى دى ياخويا،،بيقولولى قال دى السبب ان محدش بيشوف اللى بينتشر ،،ألا هو أنت ملاحظتش ده على صفحتك ؟

بصراحة لا يا أمينة واللايكات عندى عمّالة ترف زى الرز.

ومن شر حاسد إذا حسد ياسى السيد بلاش تقول الكلام ده ،بس بصراحة لايكات أنا منا باخطف رجلى لصفحتك كل يوم ومش شايفة حد بيعملك لايك غير زبيدة وجليلة بتوعك،،فالح بس تتفشخر وتقول عندى تلاتلاف صديق !!

اتلمى يا أمينة بدال ما ألمك وماتجيبيش سيرة أصدقائى على لسانك وحسك عينك تدخلى صفحتى تانى بدال ماعملك بلوك أو مدفعش الفاتورة وأرفع النت من البيت خالص.

إعملى بلوك زى مانت عايز لكن أحب على يدك إوعى تشيل النت من البيت ده أنا من غير الواى فاى مقدرش أعيش ياسى السيد!

طب اخلصى باقولك وقومى اعمليلى لقمة أنا على لحم بطنى من الصبح.

طب مس هتفهمنى الأول إيه حكاية الخزموريات دى وليه خلت الناس خفت من على صفحتي؟!

ده موضوع كبير يا أمينة وعايز وقت طويل عشان افهمهولك،بس فاكرة لما كنتى بتقولى إن أى حاجة بتتكلمى عنها أو حتى تفكرى فيها تلاقى الفيس بوك عمّال يبعتلك إعلانات عنها؟!

بسم الله الرحمن الرحيم أيوه ياخويا فعلا وياما رقيت الموبايل وبخرته عشان أطرد أشتاتاً أشتوت العفاريت منه ولا فيش فايدة!

دى مش عفاريت يا أمينة دى الخوارزميات هى إللى بتطفش الناس من صفحات الناس وتخليهم مايشوفوش اللى بينشروه وبعد ما كان المنشور من دول يلاقى ييجى متين تلتميت كومنت ولايك تلاقيه يادوبك يجبله خمسة ستة من القرايب وخلاص!

طب والحكاية دى ملهاش حل ياخويا يخلينى أعرف أرجع الناس تشوف منشوراتي؟

انكزيهم يا أمينة تلاقيهم رجعوا؟

ويطلع ايه النكز ده؟

يعنى زى ما بخبطك بكوعى فى صدرك علشان تقومى تجبيلى الأكل، ألا بالمناسبة هو الأكل إيه النهاردة؟

طاجن بامية؟

باللحمة الضانى يا أمينة؟

لا مفيش لحمة يا سى السيد!

كلام إيه ده ياولية اومال اللحمة راحت فين؟

الخوارزميات أكلتها يا سى السيد!