الجمعة، 01 مارس 2024 - 07:20 م

ماسورة مهازل.. واتفتحت علينا اسمها «التيك توك»، لا ليها طعم ولا لون..وعنوانها الرئيسى هو«الابتذال» مئات بل آلاف الفيديوهات أبطالها شخصيات مجهولة، كان مكانهم الطبيعى جنب الحيط، ستات بيوت لا يعرفن سوى المطبخ وتربية الفراخ فوق السطوح، فجأة وبقدرة قادر أصبحت الواحدة فيهم من المشاهير ولها متابعون!

وكل مرة قصة هابطة من تأليف البطل أو البطلة، مرة حماتها بتزورها، فتعامل حماتها كخادمة دون علم  زوجها، اما فى حضوره فتعيش دور الملاك البرىء، والولد يكتشف أن مراته بتخبى الأكل وتمنع أمه من الاكل وتعاملها كخادمة  فيطردها من البيت.. فيلم عربى هابط!

وهناك الشاب المصرى المتزوج من روسية وبيعمل فيديوهات تيك توك ليومياته مع زوجته اللى بتحاول تتكلم مصرى مكسر، بمساعدة والده ووالدته وطفلته الرضيعة «بمواقف قمة فى السخافة»، هذا بخلاف الست المنقبة المحترمة التى  تقوم بتعليم السيدات فن الطهى وهى لابسه ملابس ملتصقة بجسمها! والأخت التى تحكى قصص قلة اصل أخواتها، واللى بيطرد أمه واخوه من بيته إرضاء لزوجته، ولا البنت الفظيعة المريعة اللى بتطلع  تستظرف وتصرخ وتقول لوالدها عاوزة فلوس، فيديها آلاف الجنيهات تشترى ملابس واكسسوار !!

 وترجع تصرخ بشكل جنونى وبصوت لا يليق الا بحمار يجر عربية تبن فى شارع ضيق !!

وللاسف.. ماسورة المهازل التى اتفتحت علينا بالتيك توك، والأشكال البشرية الضالة، لأشخاص كانوا مجرد مجموعة من الناس العاديين فتحولوا  لنجوم تيك توك، بيقبضوا من الفيديوهات الهابطة آلاف الدولارات، وبسببهم يحصد الشعب المصرى كله نظرات الازدراء والشماتة، من كل جنسيات العالم، لما تحتويه هذه الفيديوهات من قصص مسيئة ومنفرة تعكس وجها قبيحا وغير حقيقى للأسر المصرية والمصريين، وكل ده ليه؟ لأن هناك أشخاصا لا يعنيهم الا تحقيق اى مكسب بأى وسيلة!

سواء استغل زوجته وأمه وحماته للاشتراك فى قصص وهمية من تأليفه لزوم الحبكة الدرامية، وحتى وصلت للست اللى  بتعمل الكفتة فى أوضة النوم وهى لابسه جلابية بلدى وطرحه، وبعد كام فيديو.. تخرج علينا نفس السيدة ولكن بلوك جديد، يشبه الست (إيرما لادوس)، فى فيلم عفريت مراتى !! 

بكل أسى وأسف لا أعرف ماذا أصاب الأسر المصرية من اضطراب، جعلهم يبيعون الغالى والنفيس من احترام وقيم وأخلاق المصريين، مقابل الفلوس !
 ولا أعرف لماذا لا. يتحرك المركز القومى للبحوث الاجتماعية، لوقف  هذه السلوكيات الهابطة، ومتى يتحرك نواب الشعب لوضع ضوابط لوقف مهازل التيك توك  بكل مافيه من محتوى يضر بالمجتمع المصري،  لنغلق ماسورة مهازل التيك توك. الى الأبد.