الجمعة، 18 فبراير 2022 - 07:06 م

"اللي بيزيد عن حده.. بينقلب ضده".. أو بمعنى أصح "متزودهاش".. 

كام مره قعدت مع نفسك وقررت تعمل حاجة وبدأت وهوب بعد شوية وقفت أو لقيت إنك زهقت.. طب بلاش يا سيدي.. كام مرة شوفت صاحبك بيعمل حاجة غلط وقعدت كل شوية تنصحه إنه يغيرها لحد ما زهق منك واتخانق معاك.. 

بلاش ده كله كام مره قررت أو قررتي تبدأ تعمل دايت والتزمت جامد ولدرجة إنك حرمت نفسك من حاجات كتير وبالتالي زهقت.. أو كان عندك إرادة قوية وكملت زي ما ناس بتعمل بس في الأخر لقيت نفسك جالك أمراض زي الأنيميا وفقدان جسمك لنسبة كبيره من الفيتامينات قصرت بشكل كبير على صحتك.. 

هو ده الخط الرفيع بين إنك تحقق هدفك وتمشي معاه واحدة واحدة وبين إنك تزودها فتلاقي نفسك وقفت أو كملت بس السلبيات بتزيد معاك أكتر من الإيجابيات اللي أنت مستنيها.

"متزودهاش" دي مش مشكلة فردية ولا بتقتصر على فئة معينة بالعكس دي منتشرة جدا وفي كل حته كمان.. زي مثلا اضطراب الشهية أو "الأنوركسيا" وده بيخلي المريض به يعاني من خلل ملحوظ في شهيته، ويبعد بشكل كبير عن تناول الطعام.. وده طبعا بيكون له سلبيات كبيره جدا على الصحة منها الهزلان والضعف العام.

المرض ده منتشر بشكل كبير بين عارضات الأزياء وعدد كبير من الفنانات واللي بيتطلب شغلهم المحافظة بشكل كبير على أوزانهم المثالية واللي بيدفعهم لإتباع أنظمة دايت قاسية جدا.. ومنهم طبعا أنجلينا جولي اللي تعتبر واحدة من أشهر المصابين بالمرض.

خليك دايما فاكر إن خير الأمور أوسطها والمبالغة فيها ممكن تتوصل للضرر والحرمان فيها ممكن برضو يوصل للضرر.

الخُلاصة.. "متزودهاش ووازنها ومتقلقش هتخس برضو"